ប្រណាំងកង់ Giro d’Italia ដំណាក់កាលទី 15 បានទៅកីឡាករអេស្ប៉ាញ Carlos Verona

កីឡាករប្រណាំងកង់អេស្ប៉ាញ Carlos Verona បានប្រជែងឈ្នះដំណាក់កាលទី 15 នៃព្រឹត្តិការណ៍ប្រណាំងកង់លំដាប់ Grand Tour, Giro d’Italia ខណៈដែលកីឡាករម៉ិកស៊ិក Isaac del Toro នៅតែបន្តនាំមុខក្នុងតារាងរួម។ ដំណាក់កាលទី 15 ដែលមានចំងាយផ្លូវ 219 គីឡូម៉ែត្រ ជាដំណាក់កាលប្រណាំងឆ្លងកាត់ស្ថានភាពផ្លូវឡើងចុះភ្នំ

កីឡាកររបស់ក្រុម Lidl-Trek, Carlos Verona បានមកដល់ទីព្រ័ត្រមុនគេប្រើពេល 5 ម៉ោង 15 នាទី 41 វិនាទី តាមពីក្រោយដោយកីឡាករអាល្លឺម៉ង់ Florian Stork យឺតជាង 22 វិនាទី និងលេខបីកីឡាករម្ចាស់ផ្ទះអ៊ីតាលី Christian Scaroni យឺតជាង 23 វិនាទី។ ក្រោយ 15 ដំណាក់កាលនេះ កីឡាករម៉ិកស៊ិករបស់ក្រុម UAE Team Emirate នៅតែបន្តនាំមុខរួមមាន 55 ម៉ោង 54 នាទី 5 វិនាទី តាមពីក្រោយដោយកីឡាករអង់គ្លេស Simon Yates យឺតជាង 1 នាទី 20 វិនាទី និងលេខបី កីឡាករអេស្ប៉ាញ Juan Ayuso យឺតជាង 1 នាទី 26 វិនាទី។ ងាកមកអតីតជើងឯក កីឡាករស្លូវេនី Primoz Roglic បានខាតបង់ពេលវេលាជាងមួយនាទីនៅ 20 គីឡូម៉ែត្រចុងក្រោយដែលចំណុចឡើងភ្នំ ដែលធ្វើឱ្យរូបគេធ្លាក់ដល់លេខ 10 ក្នុងតារាងរួមតាមពីក្រោយអ្នកនាំមុខ 3 នាទី 53 វិនាទី។ មិនមានការប្រណាំងសម្រាប់ថ្ងៃចន្ទឡើយ ខណៈដំណាក់កាលទី 16 ថ្ងៃអង្គារមានចំងាយផ្លូវ 206 គីឡូម៉ែត្រ ឆ្លងកាត់ស្ថានភាពផ្លូវឡើងចុះភ្នំ៕