Naomi កីឡាការិនីបាល់ទាត់អាមេរិក ផ្លាស់ទៅ Chelsea ក្នុងតម្លៃបំបែកកំណត់ត្រា

ខ្សែការពារក្រុមបាល់ទាត់នារីអាមេរិក Naomi Girma បានឈានដល់កិច្ចព្រមព្រៀងហើយក្នុងការផ្លាស់មកកាន់ ក្លិបបាល់ទាត់នារីតោខៀវ Chelsea ក្នុងតម្លៃផ្ទេរបំបែកកំណត់ត្រាពិភពលោកបាល់ទាត់នារី។ តម្លៃនៃការផ្ទេរត្រូវបានគេដឹងថាប្រមាណ 90 ម៉ឺនផោន រឺ 1.1 លានដុល្លារអាមេរិក ដែលនឹងធ្វើឱ្យកីឡាការិនីវ័យ 24 ឆ្នាំរូបនេះ

ក្លាយជាកីឡាការិនីដែលផ្ទេរក្នុងតម្លៃខ្ទង់លានដុល្លារដំបូងគេ។ ក្រុមជើងឯកលីគនារីអង់គ្លេស Chelsea បានប្រជែងគ្នាជាមួយក្លិបបារាំង Lyon ក្នុងការចុះហត្ថលេខានាំយកខ្សែការពាររបស់ក្លិបនារីអាមេរិក San Diego Wave រូបនេះ។ Naomi Girma បានក្លាយជាគោលដៅចំបងរបស់ Chelsea បន្ទាប់ពីបាត់បង់ខ្សែការពារកណ្តាល Kadeisha Buchanan ដែលមានរបួសដៃសសៃពួរ ACL។ ក្រុមនារី Chelsea កំពុងឈរលើគេក្នុងលីគនាំមុខក្រុមលេខពីរ Arsenal 7 ពិន្ទុ ហើយបានកក់កៅអីនៅវគ្គ Play-Off រួចរាល់។ ឆ្នាំមុន Chelsea បាននាំយកខ្សែប្រយុទ្ធក្លិបនារី Levante កីឡាការិនី Mayra Ramirez ក្នុងតម្លៃបំបែកកំណត់ត្រាអង់គ្លេសផងដែរ 384.000 ផោន បូកនឹងប្រាក់អត្ថប្រយោជន៍ 42.600 ផោន៕