Man Utd យកបាន 3 ពិន្ទុ​នៅទឹកដី FCSB ឡេីងវគ្គចាញ់ធ្លាក់ UEL

ក្រុមបិសាចក្រហម Man Utd បានកក់កៅអីនៅវគ្គ 16 ក្រុមចុងក្រោយដោយស្វ័យប្រវត្តិហើយ ក្រោយយកឈ្នះនៅទឹកដីរ៉ូម៉ានី FCSB 2-0 ជុំចុងក្រោយនៃវគ្គវិលជុំ UEFA Europa League។ ​ខ្សែបម្រើកណ្តាលវ័យក្មេងអង់គ្លេស Kobbie Mainoo គឺជាតួអង្គសំខាន់ក្នុងជ័យជំនះនេះតាមរយៈការប៉ះបញ្ជូន Diogo Dalot ស៊ុតបញ្ចូលទីនាំមុខ

នៅនាទីទី 60 និងស៊ុតបញ្ចូលទីមួយគ្រាប់ 8 នាទីបន្ទាប់ ពីបាល់បញ្ជូនរបស់ Alejandro Garnacho។ ​ជ័យជំនះនេះធ្វើឱ្យក្រុមរបស់លោក Ruben Amorim មិនស្គាល់ចាញ់ឡើយនៅ Europa League ឈ្នះប្រាំស្មើបី ឈរលេខបី បន្តឡើងវគ្គ 16 ក្រុមចុងក្រោយដោយនឹងអាចជួបជាមួយ Real Sociedad, Galatasaray, AZ Alkmaar រឺ FC Midtjylland។ ​ក្រោយការប្រកួត 8 លើករៀងខ្លួន ក្រុមដែលធានាបានកៅអីនៅវគ្គ 16 ក្រុមដោយស្វ័យប្រវត្តិចំណាត់ថ្នាក់លេខមួយដល់លេខ 8 រួមមាន Lazio, Athletic Bilbao, Manchester United, Tottenham Hotspur, Eintracht Frankfurt, Lyon, Olympiakos និង Glasgow Rangers។ ​ដោយឡែក 16 ក្រុមទៀតនឹងត្រូវជួបគ្នាវគ្គ Play-Off ពីរជើង ដើម្បីយក 8 ក្រុមទៀតឡើងវគ្គ 16 ក្រុម។ ​វគ្គ Play-Off ទាំងពីរជើងនឹងត្រូវធ្វើឡើងពីរសប្តាហ៍ជាប់គ្នាពាក់កណ្តាលខែកុម្ភៈខាងមុខ ខណៈវគ្គ 16 ក្រុមចុងក្រោយនឹងធ្វើឡើងនៅខែមីនា៕