Aston Villa ខ្ចី Rashford ពី Man Utd អមជាមួយលក្ខណ្ឌទិញផ្តាច់

Aston Villa បានសម្រេចក្នុងការផ្ទេរយកខ្សែប្រយុទ្ធអង់គ្លេស Marcus Rashford ពីក្លិបបិសាចក្រហម Manchester United ក្នុងកិច្ចសន្យាខ្ចី។ កីឡាករវ័យ 27 ឆ្នាំរូបនេះ បានផ្លាស់ទៅកីឡដ្ឋាន Villa Park ជាមួយនឹងកិច្ចសន្យាខ្ចីដល់ចប់រដូវកាលនេះ អមជាមួយនឹងលក្ខខណ្ឌទិញផ្តាច់ផងដែរ។ កិច្ចសន្យានេះមិនមានតម្លៃផ្ទេរ

ក្នុងលក្ខខណ្ឌខ្ចីឡើយខណៈដែល Manchester United នឹងរ៉ាប់រងប្រាក់ឈ្នួលប្រចាំសប្តាហ៍ជាអប្បរមា 75%។ Rashford បានសរសេរនៅបណ្តាញសង្គម IG ថា សូមអរគុណដល់ Manchester United និង Aston Villa ដែលធ្វើឱ្យការផ្ទេរនេះកើតឡើង ការផ្លាស់មកកាន់ Villa Park ជាការសម្រេចចិត្តមិនលំបាកឡើយ។ Marcus Rashford បានស្ថិតនៅក្រៅជម្រើសរបស់លោក Amorim ច្រើនប្រកួតមកហើយក្នុងរដូវកាលនេះ ស្របពេលដែលអតីតអ្នកចាត់ការ Sporting រូបនេះ មើលឃើញពីការខ្វះការខិតខំប្រឹងប្រែងរបស់កីឡាករអង់គ្លេសរូបនេះ Marcus Rashford បានបង្ហាញខ្លួនឱ្យក្រុមជម្រើសជាតិអង់គ្លេសសរុប 60 ប្រកួត តែប្រកួតចុងក្រោយបំផុតតាំងពីខែមីនាពេលលេងមិត្តភាពទល់នឹងប្រេស៊ីល និងបានបាត់បង់កៅអីនៅ Euro 2024។ Aston Villa ថ្មីៗនេះ ទើបបាត់បង់ខ្សែប្រយុទ្ធអង់គ្លេស Ollie Watkins ដែលមានរបួសកាលពីថ្ងៃសៅរ៍ ខណៈ Jhon Duran ទើបចាកចេញទៅទឹកដីអារ៉ាប៊ីសាអ៊ូឌីត។ ជាមួយគ្នានោះដែរ ក្រុមរបស់លោក Unai Emery ក៏ត្រូវបានគេដឹងថា កៀកក្នុងការខ្ចីខ្សែបម្រើអេស្ប៉ាញ Marco Asencio ពី Paris Saint Germain ផងដែរ៕