វីរនារីវាយកូនបាល់រ៉ូម៉ានី Simona Halep ចូលនិវត្តន៍ក្នុងវ័យ 33 ឆ្នាំ

កីឡាការិនីវាយកូនបាល់រ៉ូម៉ានី Simona Halep អតីតកីឡាការិនីលេខមួយពិភពលោក Simona Halep បានសម្រេចចិត្តចូលនិវត្តន៍ពីអាជីបវាយកូនបាល់ហើយនៅក្នុងវ័យ 33 ឆ្នាំ។ អតីតជើងឯក Grand Slam ពីរលើករូបនេះ បានប្រកាសពីការចូលនិវត្តន៍របស់ខ្លួននៅលើទីលានប្រកួតអំឡុងការប្រកួតកម្មវិធី Transylvania Open

ក្រោយចាញ់ Lucia Bronzetti ជុំទីមួយ។ កីឡាការិនីវ័យ 33 ឆ្នាំរូបនេះ ធ្លាប់និយាយនៅពេលថ្មីៗនេះពីការពិចារណាចូលនិវត្តន៍ដោយសាររបួសជង្គង់ញាំញី ដែលធ្វើឱ្យនាងសម្រេចចិត្តដកខ្លួនពីការប្រកួត Grand Slam, Australian Open កាលពីខែមករាកន្លងទៅ។ ការបង្ហាញខ្លួននៅ Transylvania Open នេះ គឺជាកម្មវិធីទីប្រាំប៉ុណ្ណោះនៅ WTA Tour ដែលនាងបានចូលរួមក្រោយការដាក់ពិន័យក្រោមការចោទប្រកាន់ថាបានប្រើប្រាស់សារធាតុហាមឃាត់ ដែលខកខានការប្រកួតនានាជាងពីរឆ្នាំ។ Simona Halep បានឈ្នះជើងឯក Grand Slam ដំបូងរបស់នាងនៅឆ្នាំ 2018 US Open នៅពេលយកឈ្នះកីឡាការិនីអាមេរិក Sloane Stephens បន្ទាប់ពីធ្លាប់ចាញ់នៅវគ្គផ្តាច់ព្រ័ត្រ Grand Slam បីលើក។ នៅឆ្នាំ 2019 Halep ក៏បានឈ្នះជើងឯក Grand Slam ម្តងទៀតនៅពេលយកឈ្នះកីឡាការិនី Serena Williams នៅវគ្គផ្តាច់ព្រ័ត្រ Wimbledon។ ក្រៅពីនេះ Simona Halep ធ្លាប់ឈ្នះជើងឯកសរុប 22 កម្មវិធីនៅ WTA Tour និងធ្លាប់ចំណាយពេល 64 សប្តាហ៍ឈរនៅតំណែងលេខមួយពិភពលោក៕