Courtois ប្រាប់ថាត្រៀមរួចរាល់ ក្នុងការវិលត្រលប់ទៅជម្រេីសជាតិប៊ែលហ្ស៊ិក

អ្នកចាំទីប៊ែលហ្ស៊ិក Thibaut Courtois ត្រៀមលក្ខណៈរួចរាលសម្រាប់ការត្រលប់មកចូលរួមជាមួយក្រុមជម្រើសជាតិវិញ សម្រាប់ការប្រកួត Nations League ខែក្រោយ។ ​កីឡាកររបស់ក្លិបយក្សអេស្ប៉ាញ Real Madrid រូបនេះបានបដិសេដ និងដកខ្លួនចេញពីក្រុមជម្រើសជាតិក្រោមការដឹកនាំរបស់លោក Domenico Tedesco

តែលោក Tedesco ត្រូវបានបណ្តេញចេញពីតំណែងហើយ មានន័យថា Courtois នឹងវិលត្រលប់មកកាន់ក្រុមជម្រើសជាតិវិញ។ ​និយាយក្នុងកិច្ចសម្ភាសន៍ក្នុងកម្មវិធីរបស់ Rio Ferdinand កីឡាករវ័យ 32 ឆ្នាំរូបនេះថា នឹករលឹកក្រុមជម្រើសជាតិ និងត្រៀមខ្លួនរួចរាល់ក្នុងការប្រកួតតំណាងជាតិម្តងទៀត។ ​Courtois បានចំណាយពេលជជែកជាមួយអ្នកចាត់ការថ្មីរបស់ក្រុមជម្រើសជាតិលោគ Rudi Garcia កាលពីខែមុន ជុំវិញលទ្ធភាពនៃការវិលត្រលប់មកវិញ។ ​Thibaut Courtois បានប្រកាសពីគោលជំហររបស់ខ្លួន ថាមិនលេងឱ្យក្រុមជម្រើសជាតិប៊ែលហ្ស៊ិកឡើយក្រោមការដឹកនាំរបស់អ្នកចាត់ការរបស់លោក Domenico Tedesco ដែលធ្លាប់មានការរិះគន់ពីអ្នកគាំទ្រ។ ​រំលឹកថាអតីតអ្នកចាំទី Chelsea រូបនេះបានអវត្តមានពីក្រុមជម្រើសជាតិតាំងពីខែមិថុនាឆ្នាំ 2023 បន្ទាប់ពីត្រូវបានមើលរំលងដោយលោក Tedesco។ ចំណែក​ប៊ែលហ្ស៊ិកនឹងត្រូវជួបជាមួយអ៊ុយក្រែនពីរជើង ក្នុងការប្រកួតវគ្គ​ Play-Off ក្របខណ្ឌ UEFA Nations League ខែក្រោយ៕