Charles Leclerc ជឿជាក់ថា McLaren និង Ferrari នៅតែជាគូប្រជែងរបស់ F1

ក្រុមជើងឯក Formula One ឆ្នាំមុន McLaren នឹងនៅតែជាគូប្រជែងស្វិតស្វាញសម្រាប់ Ferrari មុនការប្រកួតរដូវកាលថ្មីដែលនឹងចាប់ផ្តើមសប្តាហ៍ក្រោយ នេះជាការលើកឡើងរបស់កីឡាករម៉ូណាកូ Charles Leclerc។ McLaren បានយកឈ្នះ Ferrari ប្រផិតប្រផើយត្រឹម 14 ពិន្ទុប៉ុណ្ណោះដើម្បីគ្រប់គ្រងជើងឯកពិភពលោកក្រុម

ស្ថាបនិក F1 ជាលើកដំបូងក្នុងរយៈពេល 26 ឆ្នាំ។ បើតាមទិន្នន័យរបស់ F1 បង្ហាញថា McLaren ធ្វើបានល្អជាង Ferrari ក្នុងការប្រើប្រាស់កម្រិតប្រេងសាំង និងមានល្បឿនលឿនជាង Ferrari បន្តិចបន្តួចឆ្លងកាត់ការធ្វើតេស្តសាកល្បងនៅបារ៉ែនសប្តាហ៍មុន។ «ខ្ញុំនៅតែជឿថា McLaren នឹងជាគូប្រជែងសំខាន់របស់ Ferrari ពួកគេមានការរៀបចំបានល្អ ពួកគេមានការងារដែលមានរបៀបរៀបរយ ដែលធ្វើឱ្យពួកយើងមិនភ្ញាក់ផ្អើលឡើយដែលពួកគេជាជើងឯកពិភពលោកឆ្នាំមុន។» នេះជាការលើកឡើងរបស់ Charles Leclerc អំឡុងពេលអបអរសាទរខួបនៃការសហការគ្នា 20 ឆ្នាំរវាង Ferrari និងក្រុមហ៊ុនផ្គត់ផ្គង់សម្ភារៈកីឡា Puma នៅមូលដ្ឋានរបស់ Ferrari ក្នុងប្រទេសអ៊ីតាលី។ ជាមួយគ្នានោះដែរ Leclerc បានលើកសរសើរមិត្តរួមក្រុមថ្មី Lewis Hamilton និងរីករាយក្នុងការសហការគ្នារដូវកាលថ្មី និងជូនពរមិត្តរួមក្រុមថ្មីអាចដណ្តើមបានជើងឯកពិភពលោកលើកទី 8 ក្នុងអាជីពនៅក្នុងវ័យ 40 ឆ្នាំនេះ។ សូមបញ្ជាក់ថា រដូវកាលថ្មី Formula One ឆ្នាំ 2025 នេះនឹងចាប់ផ្តើមសប្តាហ៍ក្រោយនេះហើយ ដោយចេញដំណើរទីលានដំបូងនៅ Albert Park ទីក្រុង Melbourne ប្រទេសអូស្រ្តាលី៕