Liverpool ចាញ់ភាគរយគ្រប់គ្រងតែឈ្នះ PSG ខណៈអ្នកចាំទី Alisson សង្គ្រោះបាល់9លើក

ក្រុមនាំមុខគេនៅ Premier League ហង្សក្រហម Liverpool ទទួលបានជ័យជំនះ 1-0 នៅទឹកដីបារាំង Paris Saint Germain ជើងទីមួយវគ្គ 16 ក្រុមចុងក្រោយ Champions League ដែលនេះជាជ័យជំនះដែលមិននឹកស្មានដល់ បន្ទាប់ពីប្រព័ន្ធលេងដ៏ជក់ចិត្តរបស់ក្រុមម្ចាស់ផ្ទះបង្កើតឱកាសច្រើនលើសលុប។

ស្ទើរពេញ 90 នាទី ក្រុមរបស់លោក Luis Enrique គ្រប់គ្រងបាល់គ្រប់ដណ្តប់លើ Liverpool ស្ទើងើបមុខមិនរួច និងមានឱកាសស៊ុតសរុប 27 លើក ចំគោលដៅ 9 លើក។ ការស៊ុតចំគោលដៅ 9 លើកសុទ្ធតែជាការសង្គ្រោះបានដោយអ្នកចាំទីប្រេស៊ីល Alisson Becker ដែលក្រោយចប់ការប្រកួតបានលើកឡើងថា ជាការប្រកួតអស្ចារ្យបំផុតក្នុងជីវិតរបស់ខ្លួន។ អតីតខ្សែបម្រើ Napoli, Khvicha Kvaratskhelia មានឱកាសស៊ុតបញ្ចូលទីយ៉ាងល្អមួយគ្រាប់ តែក្រោយឆែក VAR ឃើញថាស្ថិតនៅជំហរក្រៅល្បែង។ ផ្ទុយទៅវិញ Liverpool ដែលមានឱកាសតិចតួចបំផុតបែជារកបានគ្រាប់បាល់ជ័យជំនះដោយ Harvey Elliott ដែលផ្លាស់ប្តូរចូលជំនួស Mohamed Salah នៅចុងម៉ោង។ ចុងបញ្ចប់ម្ចាស់ផ្ទះបានត្រឹមខកចិត្ត រង់ចាំសងសឹកវិញនៅទឹកដី Liverpool សប្តាហ៍ក្រោយ។ ក្រឡេកទៅលទ្ធផលផ្សេងទៀត ទីបំផុត Bayern Munich យកឈ្នះ Bayer Leverkusen លើកដំបូងរាប់តាំងពីខែតុលាឆ្នាំ 2022 តាមរយៈជ័យជំះ 3-0 នៅកីឡដ្ឋាន Allianz Arena ជើងទីមួយវគ្គ 16 ក្រុម។ Harry Kane តែបញ្ចូលទីគ្រាប់ដំបូង និងរកបានមួយគ្រាប់ទៀតដោយបាល់ 11 ម៉ែត្រនៅវគ្គទីពីរ បន្ទាប់ពី Jamal Musiala ជាអ្នករកបានគ្រាប់ទីពីរ។ រីឯ Barcelona បានយកឈ្នះនៅទឹកដី Benfica តានតឹង 1-0 ដោយគ្រាប់បាល់របស់ Raphinha ខណៈដែល Inter Milan ឈ្នះនៅទឹកដី Feyenoord 2-0៕