កីឡាការិនីតេន្នីសរុស្ស៊ីម្នាក់ឈ្នះពាន និងប្រាក់រង្វាន់ជិត 4 លានដុល្លារតែគ្មានសិទ្ធិចាយ

កីឡាការិនីតេន្នីសរុស្ស៊ី Mirra Andreeva ថ្មីៗនេះរកបាន 597,000 ដុល្លារ ពីការឈ្នះការប្រកួតកីឡាវាយកូនបាល់ Dubai Duty Free Tennis Championships បន្ថែមលើប្រាក់រង្វាន់របស់នាងដែលធ្លាប់ឈ្នះកន្លងមក មានទំហំ 3.8 លានដុល្លារ ប៉ុន្តែទោះមានលុយច្រើនបែបនេះក្ដី តែនាងពុំទាន់មានសិទ្ធិចាយ

វាយវាបាននៅឡើយក៏ព្រោះនាងទើបមានអាយុ 17 ឆ្នាំ។ ពេលអ្នកសារព័ត៌មានសួរថា តើលុយនោះនៅឯណា? Andreeva បានប្រាប់ថា ប្រាក់រង្វាន់ទាំងអស់នៅក្នុងកុងធនាគាររបស់ឪពុកនាង។ នាងបញ្ជាក់ថា៖ «ខ្ញុំមិនអាចមានគណនីធនាគារផ្ទាល់ខ្លួនបានទេ ព្រោះខ្ញុំមិនទាន់មានអាយុ 18 ឆ្នាំពេញនៅឡើយ។ ខ្ញុំក៏មិនដឹងថា ត្រូវចាយលើអ្វីដែរ គ្រាន់តែថា ខ្ញុំចូលចិត្តញ៉ាំនំ និងកូកាកូឡា។ និយាយតាមត្រង់ទៅ ខ្ញុំមិនដឹងថាខ្ញុំចង់បានអ្វីទេ»។ ត្រូវបានគេស្គាល់ដោយសារភាពចាស់ទុំរបស់នាង ទាំងក្នុង និងក្រៅទីលាន ជារឿយៗ Andreeva ត្រូវបានគេប្រៀបធៀបទៅនឹង កីឡាការិនីវាយកូនបាល់ដូចជា Martina Hingis និង Maria Sharapova ដែលពួកគេទាំងពីរទទួលបានភាពជោគជ័យគួរឱ្យកត់សម្គាល់ ក្នុងវ័យជំទង់។ Andreeva បានឈានដល់វគ្គពាក់កណ្តាលផ្តាច់ព្រ័ត្រ Roland Garros នៅអាយុ 16 ឆ្នាំ ហើយបានឈ្នះពានរង្វាន់ចំនួនពីរបន្ទាប់ពីការប្រកួត WTA Tour ចុងក្រោយចំនួនបី។ កាលពីរដូវក្ដៅកន្លងទៅ នាងក៏បានឈ្នះមេដាយប្រាក់ក្នុងការប្រកួតកីឡាវាយកូនបាល់ផ្នែកនារី ក្នុងព្រឹត្តិការណ៍អូឡាំពិកក្រុងប៉ារីសផងដែរ។ ជ័យជម្នះនៅ Dubai Duty Free Tennis Championship ជួយឱ្យ Andreeva ក្លាយជាកីឡាការិនីវ័យក្មេងជាងគេ ឈ្នះពានរង្វាន់ក្នុងក្របខណ្ឌ WTA 1000 ហើយក៏បានឡើងឈរចំណាត់ថ្នាក់លេខ 9 ពិភពលោក មាន 3720 ពិន្ទុក្នុងដៃ និងមានគម្លាតតិចជាង 1000 ពិន្ទុ ពីក្រុមកីឡាការិនីក្នុងលំដាប់ Top 5 ៕