Lando Norris ឈ្នះការប្រណាំងទីលានដំបូងរបស់ F1 នៅ Melbourne

កីឡាករប្រណាំងរថយន្តអង់គ្លេសរបស់ក្រុម McLaren, Lando Norris បានប្រជែងឈ្នះការប្រណាំងដ៏ស្មុគស្មាញដោយសារកត្តាអាកាសធាតុនៅទីលាន Albert Park ទីក្រុង Melbourne ប្រទេសអូស្ត្រាលី ដែលជាទីលានដំបូងបើករដូវកាលថ្មី Formula One ពិភពលោក 2025។ Norris និងក្រុមការងារ McLaren

មានការសហការគ្នាយ៉ាងល្អ នៅពេលមានការប៉ះទង្គិចជាច្រើនលើកដោយសារ ភ្លៀងធ្លាក់ និងត្រូវជិះពីក្រោយរថយន្តសុវត្ថិភាពជាច្រើនលើក។ កីឡាករអង់គ្លេសរូបនេះ គឺជាអ្នកឈ្នះក្នុងពេលប្រណាំងយកទីចេញដំណើរកាលពីថ្ងៃសៅរ៍ និងបានរក្សាការនាំមុខរបស់ខ្លួននៅថ្ងៃប្រកួត Grand Prix តាំងពីដើមរហូតដល់ចប់។ មិត្តរួមក្រុម McLaren កីឡាករម្ចាស់ផ្ទះអូស្រ្តាលី Oscar Piastri បានត្រឹមខកចិត្តនៅពេលភ្លាត់ស្នៀតរអិលចេញពី ផ្លូវរបូតតំណែងលេខពីរទៅឱ្យអ្នកការពារជើងឯក Max Verstappen។ លេខបីបានទៅកីឡាករអង់គ្លេស George Russell របស់ Mercedes តាមពីក្រោយដោយកីឡាករចំនូលថ្មីរបស់ Mercedes, Andrea Kimi Antonelli លេខបួន ឯលេខប្រាំបានទៅកីឡាករថៃ Alex Albon របស់ក្រុម Williams។ ចំណែកឯកីឡាករចំនូលថ្មីរបស់ Ferrari ជើងឯកពិភពលោក 7 សម័យ Lewis Hamilton បានត្រឹមខកចិត្តប្រកួតដំបូងជាមួយក្រុមថ្មីដោយបញ្ចប់នៅចំណាត់ថ្នាក់លេខ 10 ទទួលបានមួយពិន្ទុ ខណៈដែលមិត្តរួមក្រុម Charles Leclerc បានលេខ 8។ ទីលានបន្ទាប់ Formula One នឹងធ្វើដំណើរមកដល់ទឹកដីចិនចុងសប្តាហ៍នេះ៕