មកដល់កម្ពុជាភ្លាម គ្រូបង្វឹកជម្រើសជាតិអារូបាប្រាប់ថា ក្រុមកម្ពុជាមានប្រៀបជាងខ្លួន

ក្រុមបាល់ទាត់ជម្រើសជាតិអារូបា បានធ្វើដំណើរមកដល់ទីភ្នំពេញហើយ នៅព្រឹកថ្ងៃទី19 ខែមីនានេះ ក្រោយធ្វើដំណើរជាង 17,000 km ដើម្បីត្រៀមការប្រកួតមិត្តភាពអន្ដរជាតិ កំឡុងថ្ងៃ FIFA Day ជាមួយក្រុមជម្រើសជាតិកម្ពុជា នាថ្ងៃទី25 ខែមីនា ឆ្នាំ2025 ខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ។

ចំពោះសមាសភាពកីឡាករ ដែលត្រូវបានលោក Marvic Bermúdez គ្រូបង្វឹកក្រុមជម្រើសជាតិអារូបា កោះហៅមកជួបក្រុមជម្រើសជាតិកម្ពុជា នាដើមសប្ដាហ៍ក្រោយនេះ ភាគច្រើនជាកីឡាករកំពុងប្រកបអាជីពនៅប្រទេសហូឡង់ ហើយមាន 5 រូបប៉ុណ្ណោះ ដែលលេងនៅលីគអារូបា និងមាន 2រូបប្រកបអាជីពនៅអង់គ្លេស និងអាល្លឺម៉ង់។ ទន្ទឹមជាមួយដំណើរមកដល់កម្ពុជានេះដែរ លោក Marvic Bermúdez បានសម្ដែងនូវក្ដីរីករាយ និងបានត្រៀមខ្លួនរួចរាល់ ដើម្បីជួបក្រុមម្ចាស់ផ្ទះកម្ពុជា ដែលលោកបានចាត់ទុកជាក្រុមខ្លាំងមួយ និងមានប្រៀបជាងក្រុមខ្លួន ។ បន្ថែមលើនេះ លោកក៏រំពឹងនឹងទទួលបានបទពិសោធន៍ពីការប្រកួតនៅកម្ពុជា សម្រាប់ត្រៀមការប្រកួតជម្រុះពានរង្វាន់ FIFA World Cup ប្រចាំទ្វីបអាមេរិក នាខែមិថុនាខាងមុខផងដែរ ។ ក្រឡេកទៅចាប់អារម្មណ៍លទ្ធផលប្រមាណ 10 ប្រកួតចុងក្រោយ ក្រុមមកពីទ្វីបអាមេរិកខាងត្បូងមួយនេះ មិនធ្លាប់ទទួលបានជ័យជម្នះឡើយ ដោយស្គាល់ស្មើម្ដងគត់ ក្រៅពីនោះ សុទ្ធតែរងបរាជ័យ គ្រាដែល 2ប្រកួត កាលពីចុងឆ្នាំ2024 គឺបានចាញ់ក្រុម ព័រតូរីកូ ដោយលទ្ធផល 5-1 និងចាញ់ក្រុមសាំងម៉ារតាំង 1-0 ក្នុងពានរង្វាន់ CONCACAF Nations League។ សម្រាប់ដំណើរមកកាន់ប្រទេសកម្ពុជាលើកដំបូងនេះដែរ មុននឹងជួបការប្រកួតផ្លូវការជាមួយក្រុមជម្រើសជាតិកម្ពុជា ក្រុមជម្រើសជាតិអារូបា នឹងមានការប្រកួតមិត្តភាពកម្ដៅសាច់ដុំមួយ ជាមួយក្រុមវិសាខា សមាជិកលីគកំពូលកម្ពុជា នាថ្ងៃទី22 ខែមីនាចុងសប្ដាហ៍នេះ ស្របពេលក្រុមម្ចាស់ផ្ទះកម្ពុជា ក៏មានការប្រកួតមិត្តភាពអន្ដរជាតិមួយដែរ ដោយត្រូវជួបក្រុមម្ចាស់ផ្ទះវៀតណាម នៅរាត្រីថ្ងៃពុនេះ មុនត្រឡប់មកស្វាគមន៍ក្រុមភ្ញៀវអារូបាវិញម្ដង នាថ្ងៃទី25 ខែមីនា ឆ្នាំ25 ខាងមុខ៕