Kyren Wilson យកឈ្នះមិត្តរួមជាតិ Judd Trump គ្រងជើងឯក Players Championship

ជើងឯកស្នូកឃ័រពិភពលោក Kyren Wilson បានក្លាយជាជើងឯកការប្រកួតកម្មវិធី Players Championship ជាលើកដំបូងក្នុងអាជីពក្រោយយកឈ្នះកីឡាករលេខមួយពិភពលោក Judd Trump 10-9 នៅហ្វ្រេមចុងក្រោយ។ ជាជំនួបរវាងកីឡាករកំពូលរបស់ពិភពលោកទាំងពីរនាក់ ការប្រកួតក៏បានធ្វើឱ្យអ្នកគាំទ្រស្ទើអត់ដង្ហើមដែរ

បន្ទាប់ពីដំណាក់កាលដំបូងបញ្ចប់ដោយស្មើគ្នា 4-4 ហ្វ្រេមស្វិតស្វាញ។ ឈានចូលដំណាក់កាលទីពីរ កីឡាករទាំងពីរមិនបានធ្វើឱ្យអ្នករបស់ខ្លួនស្រណុកចិត្តដែរ បន្ទាប់ពីបញ្ចប់ 18 ហ្វ្រេមស្មើគ្នា 9-9 ដែលត្រូវការលេងហ្វ្រេមកាត់សេចក្តី។ ឱកាសនៅក្នុងដៃរបស់ Judd Trump តែកីឡាករអង់គ្លេសរូបនេះហាក់បាត់ម្ចាស់ការ មុនពេលវាយកូនក្រហមពីចំងាយមិនចូល ខណៈដែលមិត្តរួមជាតិ Kyren Wilson ក្តោបយកឱកាសនេះដើម្បីយកឈ្នះ។ នេះជាជើងឯក Players Championship ដំបូងសម្រាប់ Kyren Wilson ខណៈដែល Trump ធ្លាប់ឈ្នះពីរលើកនៅឆ្នាំ 2019 និង 2020។ បន្ទាប់ពីព្រឹត្តិការណ៍ Players Championship នេះ កីឡាករទាំងពីរត្រូវត្រៀមលក្ខណៈសម្រាប់ Tour Championship មុនពេលព្រឹត្តិការណ៍ស្នូកឃ័រជើងឯកពិភពលោកដែលត្រូវធ្វើឡើងនៅខែក្រោយ។ Shaun Murphy ជើងឯក Masters និង Mark Selby សុទ្ធតែជាបេក្ខភាពឈានមុខប្រជែងជើងឯក។ ជើងឯកពិភពលោក 7 សម័យ Ronnie O’Sullivan បានប្រកាសដកខ្លួនពីការប្រកួតសំខាន់មួយចំនួនកន្លងមក ហើយនឹងបន្តដកខ្លួននៅ Tour Championship តែនឹងចូលរួមជើងឯកពិភពលោក៕