Jose Mourinho រងពិន័យពីសហព័ន្ធទួរគី 3 ប្រកួត ដោយសារក្ដិចច្រមុះគ្រូ Galatasaray

សហព័ន្ធបាល់ទាត់ទួរគី (TFF) បានប្រកាសកាលចុងសប្តាហ៍កន្លងទៅថាគ្រូបង្វឹក Fenerbahce លោក Jose Mourinho ត្រូវបានពិន័យមិនឲ្យដឹកនាំក្រុមចំនួន 3 ប្រកួត និងពិន័យជាប្រាក់ប្រហែល 6,000 ផោនបន្ទាប់ពីចាប់ច្រមុះគ្រូបង្វឹក Galatasaray លោក Okan Buruk ក្នុងការប្រកួត Derby រវាងក្លិបយក្សនៅទីក្រុង Istanbul

ទាំងពីរ។ ឧបទ្ទវហេតុនេះបានកើតឡើងនៅចុងបញ្ចប់នៃការប្រកួតពានរង្វាន់ Turkish Cup វគ្គ 8 ក្រុមចុងក្រោយកាលពីថ្ងៃពុធសប្តាហ៍មុនដែលក្រុមរបស់លោក Mourinho បានចាញ់ 2-1 ក្នុងផ្ទះខ្លួនឯង។ ការប៉ះទង្គិចគ្នាដ៏ធំបានផ្ទុះឡើងរវាងកីឡាករទាំងពីរក្រុម ដោយអាជ្ញាកណ្តាលបានបណ្តេញកីឡាករបីនាក់ចេញ ក្នុងនោះពីរនាក់មកពី Galatasaray និងម្នាក់របស់ Fenerbahce ហើយបន្ទាប់ពីកញ្ចែបញ្ចប់ការប្រកួត គ្រូបង្វឹកសញ្ជាតិព័រទុយហ្គាល់វ័យ 62 Jose Mourinho ស្ទុះទៅរកគ្រូបង្វឹក Galatasaray លោក Okan Buruk ចាប់ច្រមុះ។ Mourinho នឹងខកខានការប្រកួតជាមួយ Trabzonspor, Sivasspor និង Kayserispor។ Fenerbahce ឈរនៅលេខរៀងទី 2 ក្នុងក្របខណ្ឌលីគកំពូលទួកគី Super Lig ដោយតាមពីក្រោយក្រុមកំពូលតារាង Galatasaray ចំនួន 6 ពិន្ទុតែនៅសល់មួយប្រកួតក្នុងដៃ៕