Michal Szubarczyk ជើងខ្លាំងស្នូកឃ័រវ័យ 14 ឆ្នាំ ចង់បំបែកកំណត់ត្រា Ronnie O’Sullivan

កីឡាករស្នូកឃ័រវ័យក្មេងត្រឹម 14 ឆ្នាំ Michal Szubarczyk សង្ឃឹមថានឹងបង្កើតប្រវត្តិសាស្រ្តសប្តាហ៍នេះ នៅពេលបំបែកកំណត់របស់ Ronnie O’Sullivan ដែលកាន់កំណត់ត្រារយៈពេលយូរមកហើយ ដើម្បីក្លាយជាកីឡាករក្មេងបំផុតឆ្លងផុតវគ្គជម្រុះមានមុខនៅព្រឹត្តិការណ៍ស្នូកឃ័រជើងឯកពិភពលោក។

កីឡាករវ័យក្មេងប៉ូឡូញរូបនេះ រកបានសមិទ្ធផលច្រើនគួរសមនៅក្នុងវិធីនៃអាជីពស្នូកឃ័ររបស់ខ្លួន ដោយឈ្នះជើងឯកស្នូកឃ័រអឺរ៉ុបអាយុក្រោម 16 និងអាយុក្រោម 18 ឆ្នាំកាលពីខែមីនា។ ជាមួយគ្នានោះដែរ Michal ក៏បានឈានដល់វគ្គផ្តាច់ព្រ័ត្រការប្រកួតមិនកំណត់អាយុ តែចាញ់កីឡាករវ័យ 34 ឆ្នាំ Liam Highfield។ តែសមត្ថភាពនៅវគ្គផ្តាច់ព្រ័ត្រទោះបីបរាជ័យក៏ដោយ Michal បានធ្វើឱ្យមានការចាប់អារម្មណ៍ពីសំណាក់អ្នកគាំទ្រ និងអ្នកវិភាគតាមដានកីឡាមួយនេះ។ សមិទ្ធផលរបស់ Michal ត្រឹមវ័យ 14 ឆ្នាំ ក៏បានធ្វើឱ្យរូបគេទទួលបានសិទ្ធប្រកួតរយៈពេលពីរឆ្នាំនៅក្នុង World Snooker Tour។ គោលដៅបន្ទាប់របស់ Michal គឺបំបែកកំណត់ត្រារបស់ Ronnie O’Sullivan ដែលកាន់មកអស់រយៈពេល 33 ឆ្នាំមកហើយ នៅពេលកីឡាករអង់គ្លេសរូបនេះឆ្លងផុតវគ្គជម្រុះមានមុខនៅស្នូកឃ័រជើងឯកពិភពលោកក្នុងវ័យ 16 ឆ្នាំកាលពីឆ្នាំ 1992៕