រួមរស់អស់ 13 ឆ្នាំ Jamie Vardy ប្រកាសថា នឹងចាកចេញពី Leicester តែមិនចូលនិវត្តន៍

ខ្សែប្រយុទ្ធជើងចាស់អង់គ្លេស Jamie Vardy បានប្រកាសចាកចេញពី Leicester City ហើយក្រោយចប់រដូវកាលនេះ តែមិនមានគម្រោងចូលនិវត្តន៍ឡើយ។ កីឡាករវ័យ 39 ឆ្នាំរូបនេះ បានបញ្ជាក់ក្រោយប្រកាសពីការចាកចេញរបស់ខ្លួន ថាគ្មានគម្រោងចូលនិវត្តន៍ពីអាជីពកីឡាកររបស់ខ្លួនឡើយ

តែមិនបញ្ជាក់ច្បាស់ពីអនាគតក្លិបដែលនឹងបន្តអាជីពឡើយ។ ការប្រកាសរបស់ Jamie Vardy បានធ្វើឡើងនៅក្នុងសារជាវីដេអូនៅលើបណ្តាញសង្គម Instagram ថា នេះពានវេលាសក្តីសមបំផុតសម្រាប់ការចាកចេញពីក្លិបដែលធ្លាប់រួមរស់រយៈពេល 13 ឆ្នាំដែលភាគច្រើនមានតែអនុស្សាវរីយ៍ល្អ និងជោគជ័យ។ Jamie Vardy បានចាប់ផ្តើមអាជីពបាល់ទាត់របស់ខ្លួននៅអាយុ 23 ឆ្នាំដោយលេងឱ្យក្លិបបាល់ទាត់ Stocksbridge Park Steels ជាក្លិបនៅលីគទី 7 របស់អង់គ្លេស។ នៅឆ្នាំ 2012 Jamie Vardy ត្រូវបាន Leicester City ទិញពី Fleetwood Town ក្នុងតម្លៃត្រឹម 1 លានផោន ដែលជាការចំណាយប្រថុយប្រថានមួយសម្រាប់ក្លិប តែផ្ទុយមកវិញគឺផ្លាស់ដ៏អស្ចារ្យសម្រាប់កីឡាករ និងក្លិប។ នៅឆ្នាំ 2016 Leicester City បានឈ្នះជើងឯក English Premier League មិនគួរឱ្យជឿក្រោមការដឹកនាំរបស់អ្នកចាត់ការអ៊ីតាលី Claudio Ranieri ស៊ុតបញ្ចូលទីបាន 24 គ្រាប់ និងឡើងវគ្គ 8 ក្រុមចុងក្រោយរដូវកាលបន្ទាប់នៅ UEFA Champions League។ នៅឆ្នាំ 2020 Vardy បានឈ្នះជ័យលាភីស្បែកជើងមាសស៊ុតបញ្ចូលទីច្រើនជាងគេនៅ Premier League និងលើកពាន FA Cup នៅឆ្នាំ 2021។ សរុបរួម Jamie Vardy បង្ហាញខ្លួនឱ្យ Leicester City 496 ប្រកួតរកបាន 160 គ្រាប់ និងមានមុខនៅក្រុមជម្រើសជាតិអង់គ្លេសនៅ Euro 2016 និង World Cup 2018។ ថ្មីៗនេះ Vardy នៅតែដើរតួរសំខាន់ក្នុងការនាំ Leicester City ឡើងមកកាន់ Premier League រដូវកាលនេះក្រោយស៊ុតបញ្ចូលទីបាន 18 គ្រាប់នៅ League Championship៕