បន្ទាប់ពីជប៉ុន ជម្រើសជាតិអ៊ីរ៉ង់ រកបានកៅអី World Cup ទី 2 របស់អាស៊ី

ក្រុមបាល់ទាត់ជម្រើសជាតិអ៊ីរ៉ង់ បានធានាកៅអីរបស់ខ្លួនសម្រាប់ព្រឹត្តិការណ៍បាល់ទាត់ពិភពលោក 2026 ឆ្នាំក្រោយហើយ ក្រោយស្មើនៅទឹកដីអ៊ូសប៊ែគីស្ថាន 2-2។ ជំនួបនៅក្នុងពូល A នេះ អ៊ីរ៉ង់ត្រូវការតែមួយពិន្ទុប៉ុណ្ណោះដើម្បីចូលរួមជាមួយជប៉ុនសម្រាប់កៅអីឆ្នាំក្រោយ តែពួកគេត្រូវតាមពីក្រោយក្រុមភ្ញៀវពីរលើក ពោលគឺអ៊ូសប៊ែគីស្ថាននាំមុខ

លើកដំបូងដោយ Hojimat Erkinov នាទីទី 16 មុនពេល Mehdi Taremi តាមស្មើវិញនៅនាទីទី 23។ ឈានចូលវគ្គទីពីរក្រុមភ្ញៀវនាំមុខសាជាថ្មីដោយបាល់ហ្វ្រីឃីករបស់ Abbosbek Fayzullaev តែជាថ្មីម្តងទៀត ខ្សែប្រយុទ្ធ Inter Milan, Mehdi Taremi ជាអ្នកតាមស្មើ ខណៈលទ្ធផលបញ្ចប់ដោយស្មើគ្នា 2-2 សមតាមបំណងចង់បានត្រឹមមួយពិន្ទុសម្រាប់អ៊ីរ៉ង់។ ពូល A នេះអ៊ីរ៉ង់មាន 20 ពិន្ទុពីការប្រកួត 8 លើកដាច់ក្រុមលេខបីអារ៉ាប់រួម 7 ពិន្ទុនៅសល់ពីរប្រកួតទៀតចប់ មានន័យថាធានាកៅអី World Cup ឆ្នាំក្រោយ។ អ៊ូសប៊ែគីស្ថានកំពុងកាន់តំណែងលេខពីរក្នុងពូល ជាតំណែងកៅអីស្វ័យប្រវត្តិតែរង់ចាំប្រកួតបន្តទៀតខណៈអារ៉ាប់រួមកំពុងដេញពីក្រោយបួនពិន្ទុក្រោយឈ្នះនៅទឹកដីកូរ៉េខាងជើង 2-1។ ចំណែកនៅក្នុងពូល B វិញនៅមិនទាន់ដាច់ស្រឡះនៅឡើយក្រោយកូរ៉េបានត្រឹម 1-1 ក្នុងទឹកដីខ្លួនឯងទល់នឹងហ្សកដានី។ Lee Jae-sung បើកការនាំមុខឱ្យម្ចាស់ផ្ទះកូរ៉េត្រឹមប្រាំនាទីដំបូងក្រោយទទួលបាល់ជ្រុងពី Heung-min Son។ ត្រឹមកន្លះម៉ោងហ្សកដានីក៏តាមស្មើវិញបានដោយ Mahmoud Al-Mardi ស៊ុតផ្លាតនឹងខ្សែការពារកូរ៉េ Kwon Kyung-won ។ លទ្ធផលនេះមានន័យថាកូរ៉េបន្តនាំមុខគេដដែលមាន 16 ពិន្ទុតាមពីក្រោយបីពិន្ទុដោយហ្សកដានីមាន 13 ពិន្ទុខណៈអ៊ីរ៉ាក់មាន 12 ពិន្ទុ និងអូម៉ង់មាន 10 ពិន្ទុ។ ក្រលេកទៅចាប់អារម្មណ៍ពូល C មានតែជប៉ុនប៉ុណ្ណោះដែលធានាកៅអី World Cup ដោយមាន 20 ពិន្ទុខណៈអូស្រ្តាលីកំពុងកាន់កាប់តំណែងលេខពីរក្រោយយកឈ្នះនៅទឹកដីចិន 2-0 ទទួលបានបីពិន្ទុបន្ថែមមាន 13 ពិន្ទុ។ អារ៉ាប៊ីសាអ៊ូឌីតកំពុងឈរលេខបីមាន 10 ពិន្ទុ ខណៈឥណ្ឌូនេស៊ីមាន 9 ពិន្ទុឈរលេខបួន។ ពីរក្រុមកំពូលក្នុងពូលនីមួយៗ ទទួលបានកៅអីស្វ័យប្រវត្តិខណៈពីរក្រុមលេខបីនិងលេខបួនក្នុងពូលនីមួយៗត្រូវបន្ថដំណើរទៅលេងជុំទីបួន៕