អ្នកលេង Slam Dunk អាមេរិក McClung ឈ្នះជេីងឯកជាលេីកទី 3 ជាប់គ្នា​

កីឡាករបាល់បោះអាមេរិក Mac McClung បានក្លាយជាម្ចាស់ពាន NBA Slam Dunk បីឆ្នាំជាប់គ្នាក្នុងព្រឹត្តិការណ៍ប្រចាំឆ្នាំ NBA All-Star នៅទីក្រុង San Francisco សហរដ្ឋអាមេរិក។ ​កីឡាករវ័យ 26 ឆ្នាំដែលកំពុងប្រកបអាជីពជាមួយក្លិបបាល់បោះ Orlando Magic រូបនេះ ទទួលបាន 50 ពិន្ទុពេញពីគណកម្មការ

ទាំងប្រាំក្នុងការបញ្ចេញបច្ចេកទេសបោះបញ្ចូលកន្ត្រកដែលហក់រំលងរថយន្តមួយគ្រឿងចតពីក្រោមកន្ត្រកបានយ៉ាងល្អឥតខ្ចោះ។ ​វគ្គទីពីរ McClung ហក់រំលងមនុស្សកាន់បាល់ពីលើក្បាល និងហក់រំលឹងបោះបាល់បញ្ចូលកន្ត្រកបានសម្រេច និងទទួលបាន 50 ពិន្ទុពេញជាលើកទីពីរ។ ​វគ្គទីបីកាន់តែអស្ចា្យ កីឡាកររបស់ Orlando រូបនេះ ហក់រំលងមនុស្សដដែល តែបោះបញ្ចូលកន្ត្រកបាល់ម្តងពីរដែលកាន់ដោយបុរសម្នាក់ទៀតក្បែកន្ត្រក ហើយលើកនេះក៏ទទួលបាន 50 ពិន្ទុពេញម្តងទៀត។ ​វគ្គទីចុងក្រោយនៅតែសម្រេចបានយ៉ាងល្អឥតខ្ចោះនិងទទួលបាន 50 ពេញទៀត ដោយលើកនេះ McClung ត្រូវហក់រំលងមនុស្សកាន់បាល់ដដែល តែបាល់ដែលបោះចូលត្រូវប៉ះមាត់កន្ត្រកមួយប៉ះសិន មុននឹងញាត់ចូលកន្ត្រក។ ​សូមបញ្ជាក់ដែរថា Mac McClung មិនសូវបានបង្ហាញខ្លួនជាប់លាប់នៅ NBA ឡើយដោយភាគច្រើនគេបានលេងនៅក្របខណ្ឌ G League ដែលជាក្របខណ្ឌថ្នាលរបស់ NBA និងឈ្នះជ័យលាភី MVP រដូវកាលមុន។ ​នៅក្របខណ្ឌកំពូល NBA, McClung បង្ហាញខ្លួនបានត្រឹមប្រាំប្រកួតប៉ុណ្ណោះជាមួយ Los Angeles Lakers, Chicago Bulls, Philadelphia 76ers និង Orlando Magic។ ​នៅព្រឹត្តិការណ៍ NBA All-Star នេះដែរកីឡាករកំពូលរបស់អាមេរិក Stephen Curry ឈ្នះជ័យលាភី MVP ក្រោយក្រុមរបស់ខ្លួន Team Shag យកឈ្នះ Team Chuck 41-25 ខណៈកីឡាករវ័យ 36 ឆ្នាំរូបនេះបោះបាន 12 ពិន្ទុម្នាក់ឯង៕