Antony ផ្លាស់ពី Man Utd ទៅ Betis ក្នុងលក្ខណ្ធខ្ចី​ ដល់ចប់រដូវកាល

ក្លិបបិសាចក្រហម Manchester United បានយល់ព្រមសំណើរខ្ចីរបស់ក្លិបអេស្ប៉ាញ Real Betis ក្នុងការនាំយកខ្សែបម្រើស្លាបប្រេស៊ីល Antony ទៅកាន់ទឹកដីអេស្ប៉ាញដល់ចប់រដូវកាល។ ​បើតាមការចុះផ្សាយរបស់សារព័ត៌មានអង់គ្លេសឱ្យដឹងថា កិច្ចព្រមព្រៀងខ្ចីនេះមិនភ្ជាប់ជាមួយលក្ខខណ្ឌទិញផ្តាច់ឡើយ។ ​

Antony កីឡាករជម្រើសជាតិប្រេស៊ីលបានផ្លាស់មកកាន់ Manchester United នៅឆ្នាំ 2022 ផ្ទេរពីក្លិបហូឡង់ Ajax Amsterdam នៅពេល Erik ten Hag ជាអ្នកចាត់ការ។ ​Antony គឺជាកីឡាករទិញចូលថ្លៃបំផុតទីពីរក្នុងប្រវត្តិសាស្រ្តក្លិប ពោលគឺតម្លៃ 80.75 លានផោន។ ​យ៉ាងណាក្តី អាជីពរបស់កីឡាករវ័យ 24 ឆ្នាំរូបនេះមិនជោគជ័យឡើយនៅ Old Trafford ស្របពេលក្លិបកំពុងធ្លាក់ចុះ ពោលគឺបង្ហាញខ្លួនបានសរុប 62 ប្រកួតរកបាន 5 គ្រាប់ តែឈ្នះជើងឯក FA Cup ជាមួយក្លិបមួយលើករដូវកាលមុន៕