Besiktas ប្រកាសពីការតែងតាំងអ្នកចាត់ការថ្មី Ole Gunnar Solskjaer

អតីតខ្សែប្រយុទ្ធ និងអ្នកចាត់ការក្រុមបិសាចក្រហម Manchester United លោក Ole Gunnar Solskjaer បានបង្ហាញមុខផ្លូវការក្នុងសន្និសីទសារព័ត៌មាន ជាអ្នកចាត់ការថ្មីរបស់ក្លិបទួកគី Besiktas។ ​បុរសសញ្ជាតិន័រវេសរូបនេះបានបញ្ជាក់ថា លោកបានបដិសេធសំណើមួយចំនួនមុនពេលទទួលយកសំណើពី

Besiktas នៅពេលនេះ ដើម្បីទទួលបានការប្រកួតប្រជែងថ្មីក្នុងអាជីព។ ​បុរសវ័យ 51 ឆ្នាំរូបនេះ បានចុះហត្ថលេខាលើកិច្ចសន្យាមួយឆ្នាំកន្លះ មានន័យថាលោកនឹងដឹកនាំក្រុមនៅទីក្រុង Istanbul មួយនេះដល់ដំណាច់រដូវកាលក្រោយ។ ​Besiktas ដែលធ្លាប់ឈ្នះជើងឯកលីគកំពូលទួកគី 16 លើក បច្ចុប្បន្នកំពុងឈរលេខ 6 ក្នុងតារាង ក្រោមការដឹកនាំរបស់អតីតអ្នកចាត់ការសញ្ជាតិហូឡង់ Giovanni van Bronckhost ដែលត្រូវបានបញ្ចប់តំណែងកាលពីខែវិច្ឆិកា។ ​ការងារដំបូងរបស់លោក Solskjaer គឺដឹកនាំ Besiktas ជួបក្លិបអេស្ប៉ាញ Athletic Bilbao នៅ Europa League យប់ថ្ងៃពុធនេះ។ Besiktas បច្ចុប្បន្នកំពុងឈរលេខ 28 ក្នុងតារាង Europa League ខណៈនៅសល់ពីរប្រកួតទៀតចប់វគ្គវិលជុំ។ ​មុនឈានដល់ការចរចាមកដឹកនាំក្លិបទួកគីនេះ Ole Gunnar Solskjaer ក៏ធ្លាប់មានទំនាក់ទំនងជាមួយ Leicester City និង West Ham ផងដែរ តែមិនមានកិច្ចព្រមព្រៀងណាមួយកើតឡើងឡើយ។ ​រំលឹកថា Solskjaer បានចំណាយពេល 9 រដូវកាលពេលជាកីឡាករជាមួយ Manchester United ឈ្នះជើងឯក English Premier League 9 លើក ស៊ុតបញ្ចូលទីបានជាង 100 គ្រាប់៕