គ្រូបង្វឹកកម្ពុជា និងអារូបា លើកឡើងពីក្ដីរំពឹងរៀងខ្លួន មុនជំនួបរាត្រីនេះ

លោក Koji Gyotoku គ្រូបង្វឹកក្រុមជម្រើសជាតិកម្ពុជា បានចាត់ទុកជំនួបមិត្តភាពអន្ដរជាតិ ជាមួយក្រុមជម្រើសជាតិអារូបា នាល្ងាចថ្ងៃទី25 ខែមីនា ឆ្នាំ2025 គឺជាបទពិសោធន៍ថ្មីមួយ សម្រាប់ក្រុមគោព្រៃ ដែលត្រូវជួបក្រុមមកពីទ្វីបផ្សេង ហើយសង្ឃឹមថា កូនក្រុមនឹងបង្ហាញការលេមួយដ៏ល្អ ចំពោះមុខអ្នកគាំទ្រ ក្នុងជំនួបមិត្តភាពបើកឆាក

ឆ្នាំថ្មីនេះ ។ ថ្លែងក្នុងសន្និសីទសារព័ត៌មានមុនការប្រកួតនៅថ្ងៃទី24 ខែមីនានេះ លោក Koji បានលើកថា ការប្រកួតជាមួយអារូបា គឺជាជំនួបដ៏ល្អមួយ ដែលលោកនឹងព្យាយាមជំរុញកូនក្រុមលេងឲ្យអស់ពីសមត្ថភាព ។ ទោះបីការប្រមូលផ្ដុំមិនទាន់ល្អតាមផែនការ តែលោកពិតជាចង់ឈ្នះការប្រកួតនេះ ពិសេសគឺការបង្ហាញទម្រង់លេងដ៏ល្អរបស់កូនក្រុម ។ រីឯប្រធានក្រុមគោព្រៃកម្ពុជា កីឡាករ កាន់ ម៉ូ ក៏បានបង្ហាញនូវការប្ដេជ្ញាចិត្តយ៉ាងមុតមាំក្នុងការប្រកួតនេះ ដើម្បីស្វែងរកជ័យជម្នះជូនអ្នកគាំទ្រកម្ពុជា ។ យ៉ាងណា កាន់ ម៉ូ ថាការប្រកួតនេះ មែនជាការប្រកួតងាយស្រួយឡើយ ទោះបីអារូបា បានធ្វើដំណើរវែងឆ្ងាយក៏ដោយ ។ ដោយឡែកលោក Marvic Bermudez គ្រូបង្វឹកក្រុមជម្រើសជាតិអារូបា និងកីឡាករ Nickenson Paul បានសម្ដែងក្ដីរីករាយក្នុងការមកប្រកួតមិត្តភាពនៅកម្ពុជា ។ លោកទទួលស្គាល់ពីគុណភាពកីឡាកររបស់កម្ពុជា តែបើក្រឡេកទៅមើលចំណាត់ថ្នាក់ពិភពលោកក្រុមទាំងពីរ គឺប្រហាក់ប្រហែលគ្នា ។ ដូច្នេះលោកសង្ឃឹមថា ការប្រកួតមិត្តភាពនេះ នឹងក្លាយជាការប្រកួតទាក់ទាញ ។ គួរដឹងថា ជំនួបមិត្តភាពអន្ដរជាតិ រវាងក្រុមជម្រើសជាតិកម្ពុជា និងក្រុមជម្រើសជាតិអារូបា នឹងធ្វើឡើងនាវេលាម៉ោង 7:30នាទីយប់ ថ្ងៃទី25 ខែមីនា ឆ្នាំ2025 នៅពហុកីឡដ្ឋានជាតិមរតកតេជោ ។ នេះគឺជាជំនួបមិត្តភាពទី2 អំឡុងថ្ងៃ FIFA Day ប្រចាំខែមីនា ឆ្នាំ2025 ដោយប្រកួតទី1 របស់ក្រុមគោព្រៃ បានរងបរាជ័យក្រោមថ្វីជើងក្រុមម្ចាស់ផ្ទះវៀតណាម 2-1 គ្រាដែលប្រកួតដំបូងរបស់ក្រុមជម្រើសជាតិអារូបា គឺចាញ់ក្រុមសមាជិកលីគកំពូលកម្ពុជា វិសាខា 3-1 កាលពីថ្មីៗកន្លងទៅ ។