គ្រូបង្វឹកកម្ពុជា លោក Koji ថាចាញ់អារូបា 1-2 ដោយមិនអស់ចិត្ត

លោក Koji Gyotoku គ្រូបង្វឹកក្រុមជម្រើសជាតិកម្ពុជា បានសម្ដែងការសោកស្ដាយជាខ្លាំង ចំពោះការបរាជ័យក្នុងជំនួបមិត្តភាពអន្ដរជាតិ ទល់នឹងក្រុមជម្រើសជាតិអារូបា ដោយលទ្ធផល 2-1 កាលពីរាត្រីថ្ងៃអង្គារកន្លងទៅ ។ ប៉ុន្ដែលោក Marvic Bermudez គ្រូបង្វឹកក្រុមជម្រើសជាតិអារូបា បានលើកឡើងថា បើសិនកម្ពុជាគ្មានកាតក្រហម

ម្ល៉េះក្រុមខ្លះអាចនឹងជួបការលំបាកខ្លាំង ពិសេសនៅវគ្គទី2 បន្ទាប់ពីកូនក្រមចាប់ផ្ដើមថមថយកម្លាំង។ គួរដឹងថា ជំនួបមិត្តភាពមានអ្នកទស្សនាផ្ទាល់ជិត 1ម៉ឺននាក់នេះ ក្រុមភ្ញៀវអារូបា បាននាំមុខក្រុមគោព្រៃ 2គ្រាប់ ដោយកីឡាករ Walter Bennett នៅនាទីទី3 និងកីឡាករ Rovien Ostiana នៅនាទី11 គ្រាដែលចុងវគ្គទី1 សមាជិកក្រុមម្ចាស់ផ្ទះ Yudai Ogawa បានកាតក្រហម ។ យ៉ាងណាចូលវគ្គទី2 ទោះបីសល់គ្នាត្រឹម 10 ទល់ 11នាក់លើទីលាន តែកម្ពុជាមានឱកាសច្រើន រហូតដល់នាទី57 ទើបកីឡាករ Nick Taylor វាយបកបាន 1គ្រាប់វិញឲ្យក្រុមម្ចាស់ផ្ទះ ។ ប៉ុន្ដែនៅនាទី90 កម្ពុជាសល់សមាជិកត្រឹម ៩នាក់ប៉ុណ្ណោះ ក្រោយ Andres Nieto ទទួលកាតក្រហមម្នាក់ទៀត ហើយលទ្ធផលនេះ ក៏បានរក្សាដល់ចប់ការប្រកួតពេញម៉ោង ។ លោក Koji បានលើកឡើងក្នុងសន្និសីទក្រោយចប់ការប្រកួតថា លោកនឹងទទួលខុសត្រូវចំពោះលទ្ធផលនេះ និងបានសុំទោសអ្នកគាំទ្រ ដ្បិតការប្រកួតបានបញ្ចប់ដោយសល់គ្នាត្រឹម 9នាក់ ។ លោកទទួលស្គាល់អារូបា គឺជាក្រុមល្អមួយ ពិសេសគុណភាពកាយសម្បទា ។ លោកពិតជាមានការសោកស្ដាយបំផុត ដ្បិតតាំងពីលោកដឹកនាំក្រុមជម្រើសជាតិ U16, U17, U18, U19, U20 រហូតដល់ក្រុមធំ គឺមិនធ្លាប់មានប្រកួតណា ធ្វើឲ្យលោកសោកស្ដាយបែបនេះឡើយ ។ លោកនឹងព្យាយាមកែប្រែនូវចំណុចខ្វះខាត ដើម្បីទទួលបានលទ្ធផលល្អជូនអ្នកគាំទ្រកម្ពុជាវិញ ។ ដោយឡែកលោក Marvic Bermudez បានសម្ដែងក្ដីរីករាយ ចំពោះការអនុវត្តតាមផែនការលេងរបស់កូនក្រុម រហូតទទួលបានជ័យជម្នះ ។ យ៉ាងណាលោកទទួលស្គាល់ ប្រសិនបើកម្ពុជា មិនមានកីឡាកររងពិន័យក្រហមទេ ក្រុមរបស់ខ្លួន អាចនឹងជួបការលំបាក ព្រោះចូលវគ្គទី2 កីឡាករអារូបា ចាប់ផ្ដើមធ្លាក់ចុះកម្លាំង ។ លោកបន្ដទៀតថា ប្រហែលកីឡាករកម្ពុជា គិតថាការប្រកួតងាយស្រួល ទើបពេលមានការប៉ះទង្គិច បង្កឲ្យមានការឆេវឆាវ រហូតត្រូវពិន័យកាតក្រហម 2នាក់ ។ ជាមួយការខកចិត្តសម្រាប់លទ្ធផលការប្រកួតមិត្តភាពអន្ដរជាតិនេះដែរ ក្នុងនាមគ្រូបង្វឹក លោក Koji Gyotoku បានអំពាវនាវទៅអ្នកគាំទ្រ សូមបន្តជួយលើកទឹកចិត្តដល់ក្រុមកីឡាករកម្ពុជា និងសំណូមពរកុំឲ្យមានការវាយប្រហារសំដៅលើកីឡាករណាម្នាក់ ព្រោះការប្រកួតនេះ លោកជាអ្នកសម្រេចចិត្តស្ទើទាំងស្រុងទៅលើប្រព័ន្ធលេង ការផ្លាស់ប្តូរកីឡាករ និងការជ្រើសរើសកីឡាករជាដើម៕