កម្ពុជា ទទួលបានសិទ្ធិធ្វើម្ចាស់ផ្ទះវគ្គជម្រុះតាមពូល AFC Women’s Asian Cup

កម្ពុជាបានទទួលសិទ្ធធ្វើម្ចាស់ផ្ទះរៀបចំការប្រកួតជម្រុះក្នុងពូល នៃព្រឹត្តិការណ៍បាល់ទាត់នារីអាស៊ី ឆ្នាំ2026 (AFC Women’s Asian Cup Australia 2026 Qualifiers) នាចុងខែមិថុនា ឆ្នាំ2025 ។ នេះបើយោងតាមការជូនដំណឹងសហព័ន្ធកីឡាបាល់ទាត់កម្ពុជា។ ប្រភពដដែលបានបញ្ជាក់ថា ការប្រកួតជម្រុះក្នុងពូល

នៃពានរង្វាន់បាល់ទាត់នារីជើងឯកអាស៊ី ឆ្នាំ2026 នឹងប្រព្រឹត្តទៅ ចាប់ពីថ្ងៃទី23 ខែមិថុនា ដល់ថ្ងៃទី05 ខែកក្កដា ឆ្នាំ2025 ដោយមានក្រុមជម្រើសជាតិនារី គ្រប់បណ្ដាលប្រទេសក្នុងទ្វីបអាស៊ីចូលរួមទាំងអស់ និងបែងចែកជា 8ពូល ។ យ៉ាងណាមិញសហព័ន្ធ ពុំទាន់បញ្ជាក់ពីទីលាន ដែលត្រូវរៀបចំការប្រកួតចម្រុះនេះឡើយ។ ដោយឡែកចំពោះការចាប់ឆ្នោតបែងចែកពូលប្រកួតនីមួយៗ គ្រោងនឹងធ្វើឡើងនាថ្ងៃទី27 ខែមីនាខាងមុខ នៅទីស្នាក់ការសហព័ន្ធកីឡាបាល់ទាត់អាស៊ី(AFC) នាប្រទេសម៉ាឡេស៊ី ។ ដូច្នេះចាំមើលតើក្រុមជម្រើសជាតិកម្ពុជា នឹងស្ថិតនៅពូលណា ហើយត្រូវស្វាគមន៍ក្រុមជម្រើសជាតិនារី ប្រទេសណាខ្លះ ក្នុងនាមម្ចាស់ផ្ទះការប្រកួតជម្រុះក្របខណ្ឌបាល់ទាត់នារីប្រចាំទ្វីបនេះ? គួរដឹងថា កាលពីរដូវកាលមុន ក្រុមជម្រើសជាតិនារីចិន បានគ្រងជើងឯក បន្ទាប់ពីយកឈ្នះក្រុមជម្រើសជាតិនារីកូរ៉េខាងត្បូង ដោយលទ្ធផល 3-2 ក្នុងវគ្គផ្ដាច់ព្រ័ត្រ កាលពីឆ្នាំ2022 ប៉ុន្ដែព្រឹត្តិការណ៍បាល់ទាត់នារីប្រចាំទ្វីប 4ឆ្នាំម្ដងនេះ ពុំមានវត្តមានក្រុមជម្រើសជាតិនារីកម្ពុជាចូលរួមប្រកួតជម្រុះនោះទេ ៕