Feyenoord តែងតាំង Robin van Persie ជាអ្នកចាត់ការថ្មី

អតីតខ្សែប្រយុទ្ធ Arsenal និង Manchester United, Robin van Persie ត្រូវបានតែងតាំងជាគ្រូបង្វឹកនៃក្លិបបាល់ទាត់ហូឡង់ Feyenoord កាលពីចុងសប្តាហ៍កន្លងទៅជាមួយនឹងកិច្ចសន្យាពីរឆ្នាំ។ បុរសវ័យ 41 ឆ្នាំដែលបានចូលនិវត្តន៍ពីអាជីពកីឡាករបាល់ទាត់កាលពីឆ្នាំ 2019 បានចាកចេញពីតំណែងនៅក្លិបហូឡង់ Heerenveen

ដើម្បីទទួលតំណែងនៅ Feyenoord នេះ ដែលជាក្លិបខ្លួនធ្លាប់ប្រកបអាជីពបង្ហាញខ្លួនបាន 122 ប្រកួតស៊ុតបញ្ចូលទីបាន 46 គ្រាប់។ Van Persie បានចុះហត្ថលេខាក្នុងកិច្ចសន្យាដែលមានសុពលភាពដល់ឆ្នាំ 2027 ដោយមានជំនួយការលោក Rene Hake ដែលធ្លាប់ជាសមាជិកគ្រូបង្វឹក Erik ten Hag នៅ Manchester United។ Feyenoord បច្ចុប្បន្នកំពុងឈរលេខបីនៅលីគកំពូលហូឡង់ 11 ពិន្ទុតាមពីក្រោយក្រុមកំពូលតារាង Ajax Amsterdam បន្ទាប់ពីបញ្ចប់តំណែងគ្រូបង្វឹកសញ្ជាតិដាណឺម៉ាក Brian Priske សប្តាហ៍មុន។ រំលឹកថា Robin van Persie ធ្លាប់ចំណាយពេល 8 ឆ្នាំនៅ Arsenal ពីឆ្នាំ 2004 ឈ្នះជើងឯក FA Cup នៅទីនោះ មុនពេលផ្លាស់ទៅ Manchester United នៅឆ្នាំ 2012 ឈ្នះជើងឯក Premier League ក្នុងរដូវកាលដំបូងតែម្តង៕