អតីតកីឡាករបាល់ទះជប៉ុន Takehito Hamada ចូលរួមជួយសហព័ន្ធកីឡាបាល់ទះកម្ពុជា

សហព័ន្ធកីឡាបាល់ទះកម្ពុជា បានប្រកាសអំពីកិច្ចសហការ 4ចំណុច ជាមួយលោក Takehito Hamada គ្រូបង្វឹកកីឡាបាល់ទះឆ្នេរខ្សាច់ និងជាអតីតកីឡាករបាល់ទះអាជីពជប៉ុន ចន្លោះឆ្នាំ2001-2016 ដើម្បីរួមចំណែកក្នុងការអភិវឌ្ឍ ទាំងកីឡាបាល់ទះក្នុងសាល និងឆ្នេរខ្សាច់នៅកម្ពុជា។ កិច្ចសហការនេះ ធ្វើឡើងក្រោមជំនួបពិភាក្សាការងារ

រវាងលោកបណ្ឌិត អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា ជាមួយលោក Takehito Hamada កាលពីចុងសប្ដាហ៍កន្លងទៅ។ យោងតាមការជូនដំណឹងរបស់សហព័ន្ធ កិច្ចសហការរវាងភាគីទាំងពីរ រួមមាន៖ 1. សហការរកគ្រូបង្វឹកបណ្ដុះបណ្ដាលកីឡាករ ទាំងក្នុងសាល និងឆ្នេរខ្សាច់, 2. សហការរកអ្នកជំនាញផ្នែកចាប់សរសៃរ និងម៉ាស្សា និងជំនាញផ្នែកអាហារូបត្ថម្ភសម្រាប់កីឡាករ, 3. អញ្ជើញគ្រូបង្វឹកបាល់ទះក្នុងសាលនៅប្រទេសជប៉ុនមកចែករំលែកបទពិសោធន៍ និង 4. អញ្ជើញក្លិបកីឡាបាល់ទះប្រទេសជប៉ុន មកប្រកួតមិត្តភាពអន្តរជាតិនៅប្រទេសកម្ពុជា។ ក្រោយជំនួបពិភាក្សាប្រកបដោយផ្លែផ្កានេះ លោក Takehito Hamada ក៏បានផ្ដល់នូវបាល់ទះឆ្នេរខ្សាច់ចំនួន 12គ្រាប់ ដល់សហព័ន្ធ ក៏ដូចជាការពិនិត្យការហ្វឹកហាត់ផ្ទាល់ជាមួយកីឡាករបាល់ទះឆ្នេរខ្សាច់កម្ពុជា នៅលើទីលានបាល់ទះឆ្នេរខ្សាច់ ក្នុងពហុកីឡដ្ឋានជាតិ(អូឡាំពិក) ផងដែរ៕