Formula 1 តេស្តឡានត្រៀមរដូវកាលថ្មី Lando Norris បើកបានលឿនជាងគេ

កីឡាករប្រណាំងរថយន្តអង់គ្លេស Lando Norris ឈរលើគេក្នុងតារាងពេលវេលាលឿនបំផុតក្នុងមួយជុំ ខណៈ Formula One ដំណើរការការបើកបរសាកល្បងផ្លូវការនៅទឹកដីបារ៉ែន ត្រៀមលក្ខណៈសម្រាប់រដូវកាលថ្មី 2025។ កីឡាកររបស់ក្រុម McLaren រូបនេះ ធ្វើបានលឿនជាងគេ 0.157 វិនាទីពីអ្នកលេខពីរមិត្តរួមជាតិអង់គ្លេស

George Russell របស់ក្រុម Mercedes តាមពីក្រោយដោយជើងឯកពិភពលោកបួនសម័យ Max Verstappen និងលេខបួន Charles Leclerc។ មិត្តរួមក្រុមថ្មីរបស់ Leclerc ដែលទើបមកកាន់ Ferrari ជើងឯកពិភពលោក 7 សម័យ Lewis Hamilton បានត្រឹមឈរលេខ 13 ប៉ុណ្ណោះ។ រំលឹកថារដូវកាលមុន McLaren គឺជាក្រុមស្ថាបនិកជើងឯកពិភពលោក តែជើងឯកពិភពលោកអ្នកបើកបរបានទៅ Max Verstappen។ 2025 នឹងជារដូវកាលប្រកួតប្រជែងថ្មីសម្រាប់ក្រុមទាំងអស់ ស្របពេលដែលក្រុម F1 ទាំងអស់បង្កើនទុនវិនិយោគច្រើនជាងឆ្នាំមុនៗ។ រដូវកាលថ្មី Formula One នឹងចាប់ផ្តើមចេញដំណើរទីលានដំបូងនៅទីលានប្រណាំង Albert Park ទីក្រុង Melbourne ប្រទេសអូស្រ្តាលីនៅពាក់កណ្តាលខែមីនាខាងមុខ៕