Fulham ទម្លាក់ Man Utd ត្រឹមវគ្គ 16 ក្រុម FA Cup ដោយប៉េណាល់ទីកាត់សេចក្ដី

អ្នកចាំទី Bernd Leno បានក្លាយជាវីរបុរសរបស់ Fulham បន្ទាប់ពីសង្គ្រោះបាល់ 11 ម៉ែត្រកាត់សេចក្តីពីគ្រាប់ យកឈ្នះក្រុមម្ចាស់ផ្ទះបិសាចក្រហម Man Utd ឡើងវគ្គ 8 ក្រុមចុងក្រោយ FA Cup។ ក្រុមភ្ញៀវ Fulham រកបានគ្រាប់នាំមុខមុនមុនចប់វគ្គទីមួយដោយ Calvin Bassey មុនពេលប្រធានក្រុម Bruno

Fernandes តាមស្មើវិញនៅវគ្គទីពីរនាទីទី 71។ ក្រុមទាំងពីរសុទ្ធតែមានឱកាសល្អរៀងខ្លួន និងគួរតែមិនចាំបាច់ត្រូវលេងបន្ថែមម៉ោង និង 11 ម៉ែត្រកាត់សេចក្តី ដូចជា Emile Smith Rowe មានឱកាសពីរដងតែសង្គ្រោះបានដោយ Andre Onana ខណៈដែលកីឡាករយុវជនរបស់ Manchester United, Chido Obi និង Alejandro Garnacho សុទ្ធតែមានឱកាសល្អតែសង្គ្រោះបានដោយអ្នកចាំទី Bernd Leno ដូចគ្នា។ វគ្គ 11 ម៉ែត្រកាត់សេចក្តីបីគ្រាប់ដំបូងសងខាងសុទ្ធតែធ្វើបានសម្រេច មុនពេលដែល Victor Lindelof និង Joshua Zirkzee ធ្វើមិនបានសម្រេច។ បរាជ័យនេះបានធ្វើឱ្យអ្នកចាត់ការ Ruben Amorim ស្ថិតក្នុងសម្ពាធបន្ថែមទៀតដោយសារនេះជាបរាជ័យទី 10 ទៅហើយក្នុង 24 ប្រកួតតាំងពីបុរសសញ្ជាតិព័រទុយហ្កាល់រូបនេះចូលកាន់តំណែង ពិបាកជាអ្នកចាត់ការមុន Erik ten Hag ដែលដឹកនាំដល់ទៅ 55 ប្រកួតទើបស្គាល់បរាជ័យ 10 លើក។ ងាកទៅលទ្ធផលផ្សេងទៀត Manchester City យកឈ្នះ Plymouth, Brighton ទម្លាក់ Newcastle, Crystal Palace ឈ្នះ Millwall, Preston ឈ្នះ Burnley និង Bournemouth ទម្លាក់ Wolves ដោយបាល់ 11 ម៉ែត្រកាត់សេចក្តី៕