ច្បាប់ថ្មី! អ្នកចាំទីកាន់បាល់លើស 8 វិនាទី ត្រូវផ្ដល់បាល់ទាត់ជ្រុងទៅក្រុមមួយទៀត

ចាប់ផ្តើមពីរដូវក្តៅខាងមុខ អ្នកចាំទីទាំងអស់នឹងត្រូវបានអនុញ្ញាតឱ្យកាន់បាល់ដល់ទៅ 8 វិនាទីមុនទម្លាក់បាល់ចុះ នេះបើតាមការផ្សព្វផ្សាយដោយសមាគមក្រុមប្រឹក្សាភិបាលបាល់ទាត់អន្តរជាតិ (IFAB)។ លទ្ធផលជាវិជ្ជមានក្នុងការសាកល្បងនៅទូទាំងប្រទេសអង់គ្លេស អ៊ីតាលី និងម៉ាល់តា បានជំរុញឱ្យអ្នកបង្កើតច្បាប់ប្រកួត IFAB

ផ្លាស់ប្តូរច្បាប់សម្រាប់ការចាប់ផ្តើមរដូវកាលថ្មី 2025-26។ ក្នុងអំឡុងពេលសាកល្បង IFAB បាននិយាយថា មានតែបួនករណីប៉ុណ្ណោះដែលអ្នកចាំទីត្រូវបានពិន័យក្នុងការប្រកួតរាប់រយ ទោះបីជាច្បាប់ត្រូវបានអនុវត្តយ៉ាងតឹងរ៉ឹងក៏ដោយ។ បើយោងតាមការបញ្ជាក់របស់ IFAB ដដែលថា អ្នកចាំទីដែលកាន់បាល់លើសពី 8 វិនាទី ការផាកពិន័យគឺផ្តល់បាល់ជ្រុងទៅកាន់គូប្រកួត ហើយអ្នកចាំទីដែលកាន់បាល់យូរ នឹងត្រូវអាជ្ញាកណ្តាលផ្តល់សញ្ញារាប់ថយក្រោយដោយម្រាមដៃពេលនៅសល់ 5 វិនាទី។ ច្បាប់ថ្មីនេះនឹងត្រូវបានអនុវត្តផ្លូវការទូទាំងពិភពលោកចាប់ពីថ្ងៃទី 1 ខែកក្កដាឆ្នាំ 2025 នេះទៅ នៅគ្រប់ការប្រកួត គ្រប់កម្រិតទាំងអស់។ មិនតែប៉ុណ្ណោះ វាក៏នឹងត្រូវអនុវត្តនៅក្នុងព្រឹត្តិការណ៍ជើងឯកក្លិបបាល់ទាត់ពិភពលោកនៅសហរដ្ឋអាមេរិកផងដែរ ដែលចាប់ផ្តើមពីថ្ងៃទី 15 ខែមិថុនាដល់ថ្ងៃទី 13 ខែកក្កដា។ រំលឹកថា ពីមុនអ្នកចាំទីអាចកាន់បាល់បានត្រឹម 6 វិនាទីប៉ុណ្ណោះ ហើយការផាកពិន័យគឺផ្តល់បាល់ In-Direct Freekick ទៅកាន់គូប្រកួត៕