រកលើសពី 5ម៉ឺនពិន្ទុ តារាបាល់បោះ LeBron James កាន់កំណត់ត្រារកបានពិន្ទុខ្ពស់ជាងគេ

កំពូលកីឡាករបាល់បោះអាមេរិក LeBron James បានក្លាយជាកីឡាករដំបូងក្នុងប្រវត្តិសាស្រ្តរបស់ NBA ដែលបោះបាន 50,000 ពិន្ទុ ក្នុងជ័យជំនះរបស់ Los Angeles Lakers លើ New Orleans Pelicans។ កីឡាករវ័យ 40 ឆ្នាំរូបនេះមាន 49,999 ពិន្ទុទៅហើយ មុនការប្រកួតមួយនេះ មុនពេលបោះបាន 34 ពិន្ទុម្នាក់ទៀតក្នុង

ជ័យជំនះលទ្ធផល 136-115។ 34 ពិន្ទុទៀតមានន័យថា LeBron James មានសរុប 50,033 ពិន្ទុ ដាច់អ្នកលេខពីរ Kareem Abdul-Jabbar 6,000 ពិន្ទុ។ ជាង 50,000 ពិន្ទុនេះបានមកពីការប្រកួតវិលជុំក្នុងរដូវកាលសរុប 41,871 ពិន្ទុ បូកបន្ថែមទាំង 8,162 ពិន្ទុនៅវគ្គ Play-Offs ដែលពិន្ទុទាំងអស់នេះសុទ្ធតែកាន់កំណត់ត្រាទាំងអស់។ នេះជាការបង្ហាញខ្លួនរដូវកាលទី 22 សម្រាប់ LeBron James នៅ NBA កាន់កំណត់ត្រាកីឡាករលេងច្រើនរដូវកាលបំផុតនៅ NBA ជាមួយនឹង Vince Carter។ ថ្វីបើឈានដល់វ័យ 40 ឆ្នាំ LeBron James មិនបានបង្ហាញពីការធ្លាក់ចុះសមត្ថភាពបង្ហាញខ្លួននៅលើទីលានប្រកួតឡើយ ខណៈដែលកាលពីថ្ងៃអង្គារកន្លងទៅ LeBron James ត្រូវបានជ្រើសរើសជាកីឡាករឆ្នើមប្រចាំខែនៅភាគខាងលិចផងដែរ តាមរយៈការបោះបានជាមធ្យម 29.3 ពិន្ទុក្នុងមួយប្រកួត 10.5 បាល់រីបោនក្នុងមួយប្រកួត និងប៉ះបញ្ជូន 6.9 ក្នុងមួយប្រកួត និងបានក្លាយជាកីឡាករវ័យចំនាស់បំផុតដែលទទួលបានពានប្រចាំខែនេះផងដែរ៕