ស្រែកដាក់អាជ្ញាកណ្តាល គ្រូបង្វឹក Lyon លោក Fonseca ត្រូវរងពិន័យ 9 ខែ

អ្នកចាត់ការក្លិបបារាំង Lyon លោក Paulo Fonseca ត្រូវបានពិន័យមិនឱ្យដឹកនាំការប្រកួតនៅលើទីលាន 9 ខែ ក្រោយការប៉ះទង្គិចដោយកំហឹងជាមួយអាជ្ញាកណ្តាល។ បុរសវ័យ 52 ឆ្នាំរូបនេះ ត្រូវបានបណ្តេញចេញពីទីលានប្រកួតនៅពេលស្រែកដោយកំហឹងជល់មុខអាជ្ញាកណ្តាលលោក Benoit Millot អំឡុងជ័យជំនះរបស់

Lyon 2-1 លើ Brest សប្តាហ៍មុននៅក្របខណ្ឌបារាំង Ligue1។ ក្នុងសេចក្តីថ្លែងការកាលពីថ្ងៃពុធ ស្ថាប័នគ្រប់គ្រងលីគបាល់ទាត់អាជីពបារាំងបានឱ្យដឹងថា បុរសសញ្ជាតិព័រទុយហ្កាល់រូបនេះ ត្រូវបានហាមឃាត់មិនឱ្យចូលទីលានប្រកួត បន្ទប់ផ្លាស់សម្លៀកបំពាក់របស់អាជ្ញាកណ្តាល រួមជាមួយនឹងការងារផ្លូវការពាក់ព័ន្ធថ្ងៃប្រកួត រួមទាំងសន្និសីតមុននិងក្រោយការប្រកួតផងដែរ រហូតដល់ថ្ងៃទី 30 ខែវិច្ឆិកា។ ការពិន័យនេះដែរ ក៏បានហាមឃាត់លោក Fonseca មិនឱ្យចូលបន្ទប់ផ្លាស់សម្លៀកបំពាក់របស់ក្រុម ផ្លូវដើរចូលទីលានប្រកួតរហូតដល់ថ្ងៃទី 15 ខែកញ្ញា។ ក្រោយហេតុការកើតឡើងលោក Paulo Fonseca ក៏បានធ្វើការសុំទោសជាសាធារណផងដែរ។ រំលឹកថាលោក Fonseca ទើបមកកាន់តំណែងនៅ Lyon កាលពីថ្ងៃទី1 ខែមករាឆ្នាំ 2025 នេះប៉ុណ្ណោះ ខណៈដែល Lyon កំពុងឈរលេខ 6 ក្នុងលីគ ហើយនឹងត្រូវជួប FCSB យប់នេះផងដែរវគ្គ 16 ក្រុមចុងក្រោយ Europa League៕