Madrid Derby៖ Real ឈ្នះ Athletico យ៉ាងតានតឹង ក្នុងជើងទី 1 ពាន UCL

ក្រុមការពារតំណែងជើងឯក Real Madrid បានយកឈ្នះគូប្រកួតរួមទីក្រុង Atletico Madrid ដោយលទ្ធផលតានតឹង 2-1 ក្នុងជំនួបជើងទីមួយវគ្គ 16 ក្រុមចុងក្រោយ UEFA Champions League ក្នុងទឹកដីរបស់ខ្លួន។ មុនឡើងមកដល់វគ្គនេះ ក្រុមរបស់លោក Carlo Ancelotti បានយកឈ្នះ Manchester City នៅវគ្គ

Play-Off ខណៈ Atletico Madrid ជាក្រុមអង្គុយរង់ចាំស្រាប់។ ខ្សែប្រយុទ្ធប្រេស៊ីល Rodrygo ជាអ្នកបើកការនាំមុខឱ្យ Real Madrid តាមរយៈគ្រាប់បាល់ប្រើជើងឆ្វេងយ៉ាងល្អរបស់ខ្លួនតាំងពីនាទីទី 4 មុនពេលដែលអតីតខ្សែប្រយុទ្ធ Manchester City ដែល Atletico Madrid ទិញមកតម្លៃ 81 លានផោន Julian Alvarez ស៊ុតគ្រាប់បាល់យ៉ាងអស្ចារ្យមួយដែរតាមស្មើវិញនៅនាទីទី 32។ គ្រាប់ជ័យជនះរបស់ Real Madrid ត្រូវរង់ចាំនៅវគ្គទីពីរនៅពេល Brahim Diaz ស៊ុតមុំស្រដៀងគ្នានឹង Julian Alvarez ដែរឱ្យ Real Madrid យកឈ្នះជើងទីមួយនេះ កាន់មួយគ្រាប់ចំណេញមុនត្រលប់ទៅទឹកដី Atletico Madrid វិញសប្តាហ៍ក្រោយ។ ងាកទៅលទ្ធផលផ្សេងទៀត ក្រុមភ្ញៀវកាំភ្លើងធំ Arsenal លើកទ័ពទៅយកឈ្នះដល់ទឹកដីហូឡង់ PSV Eindhoven ក្នុងជ័យជំនះធំធេង 7-1។ ប្រធានក្រុម Martin Odegaard ម្នាក់គត់ដែលរកបានពីរគ្រាប់ម្នាក់ឯង ក្រៅពីនោះ Jurrien Timber, Ethan Nwaneri, Mikel Moreno, Leandro Trossard និង Calafiori សុទ្ធតែស្ថិតក្នុងបញ្ជីគ្រាប់បាល់។ ម្ចាស់ផ្ទះគ្មានអ្វីតបតក្រៅពីគ្រាប់បាល់ពិន័យ 11 ម៉ែត្រធ្វើបានដោយ Noa Lang។ អាចនិយាយបានថាក្រុមរបស់លោក Mikel Arteta មានសង្ឃឹមច្រើនលើសលុបក្នុងការឈានទៅវគ្គបន្តដែរពួកគេនឹងត្រូវជួបជាមួយ Real Madrid រឺ Atletico Madrid។ ចំណែកឯ Aston Villa បានយកឈ្នះនៅទឹកដីប៊ែលហ្ស៊ិក Club Brugge 3-1 ខណៈដែល Lille ស្មើនៅទឹកដី Borussia Dortmund 1-1៕