Man City ជួប Real ម្តងទៀតនៅ UCL ចំពេលមេឃខៀវ កំពុងដុនដាប

ក្លិបកំពូលរបស់អឺរ៉ុបពីរ Manchester City និង Real Madrid នឹងជួបគ្នាម្តងទៀតរាត្រីនេះ តែជាជំនួបក្នុងគ្រាលំបាកមួយ ខណៈដែលក្រុមទាំងពីរនឹងមានតែមួយប៉ុណ្ណោះឡើងវគ្គ 16 ក្រុមចុងក្រោយ UEFA Champions League។ Real Madrid និង Manchester City ខកឱកាសឡើងវគ្គ 16 ក្រុមដោយស្វ័យប្រវត្តិក្នុងរដូវកាល

ដំបូងដែល UCL កែប្រែរូបមន្តប្រកួត បន្ទាប់ពី Real Madrid ឈរលេខ 11 ឯ Manchester City ឈរលេខ 22។ អ្នកចាត់ការ Manchester City លោក Pep Guardiola បានបង្ហាញពីអារម្មណ៍ខ្លាចរអា Real Madrid ដែលមានទម្លាប់ខ្លាំងក្នុងគ្រាលំបាក មុនក្រុមទាំងពីរជួបគ្នាជើងទីមួយវគ្គ Play-Off រកកៅអីវគ្គ 16 ក្រុមចុងក្រោយនៅកីឡដ្ឋាន Etihad។ ក្រុមទាំងពីរនឹងជួបគ្នាបួនរដូវកាលជាប់គ្នា បន្ទាប់ពីពួកគេតែងតែជួបគ្នានៅវគ្គចាញ់ធ្លាក់ UCL តាំងពីឆ្នាំ 2020។ សម្រាប់ជំនួបជើងទីមួយនៅអង់គ្លេសរាត្រីនេះ Real Madrid នឹងមិនមានវត្តមានខ្សែការពារសំខាន់ៗរួមមាន Dani Carvajal, Antonio Rudiger, Eder Militao និង David Alaba។ ជំនួបឆ្នាំនេះខុសពីឆ្នាំមុនត្រង់ថា Real Madrid មាន Kylian Mbappe ដែលគាំទ្រពីក្រោយដោយ Rodygro និង Jude Bellingham ហើយចំនុចនេះលោក Pep Guardiola មានក្តីបារម្ភពីការលំបាកក្នុងការទប់ស្កាត់កីឡាករកំពូលទាំងបីនាក់នេះ។ Manchester City មានរដូវកាលដ៏លំបាកមិនថានៅក្រៅស្រុក រឺក្នុងស្រុកឡើយ ដោយពួកគេកំពុងឈរលេខប្រាំនៅ Premier League តាមពីក្រោយក្រុមកំពូលតារាង Liverpool ដល់ទៅ 15 ពិន្ទុ៕