ជួប Club Brugge យប់នេះ Man City ត្រូវការឈ្នះដាច់ខាត ដើម្បីបន្តដង្ហើមនៅ UCL

ការប្រកួតបាល់ទាត់ក្របខណ្ឌកំពូលអឺរ៉ុប UEFA Champions League នឹងឈានដល់រាត្រីចុងក្រោយនៃវគ្គវិលជុំ ស្របពេលដែលក្រុមជើងឯកឆ្នាំ 2023 Man City ត្រូវការឈ្នះដាច់ខាតប្រកួតចុងក្រោយទល់នឹង Club Brugge ដើម្បីមានឱកាសទៅវគ្គបន្ត។ Manchester City តែងតែឡើងដល់វគ្គចាញ់ធ្លាក់ 16 ក្រុមចុងក្រោយ

គ្រប់រដូវកាលក្រោមការដឹកនាំរបស់លោកPep Guardiola ដែលមកកាន់តំណែងតាំងពីឆ្នាំ 2016 តែពេលនេះពួកគេកំពុងប្រឈមនឹងការធ្លាក់ត្រឹមជុំដំបូង នៃរូបមន្តថ្មីដោយកំពុងឈរលេខ 25 ក្នុងតារាងស្ថិតនៅពីក្រៅតំបន់ Play-Off។ 8 ក្រុមលើគេក្នុងចំណោម 36 ក្រុមនឹងត្រូវឆ្លងទៅវគ្គ 16 ក្រុមចុងក្រោយស្វ័យប្រវត្តិ ខណៈលេខ 9 ដល់លេខ 24 នៅសល់ឱកាសជួបគ្នាវគ្គ Play-Off យក 8 ក្រុមទៀត។ City បានឈ្នះជើងឯក Champions League លើកដំបូងក្នុងប្រវត្តិសាស្រ្តក្លិបនៅឆ្នាំ 2023 ហើយនៅពេលនេះលោក Pep Guardiola ចង់បានការប្រកួតដ៏អស្ចារ្យដូចវគ្គផ្តាច់ព្រ័ត្រទល់នឹង Club Brugge យប់នេះ។ បើក្រឡេកទៅមើលប្រវត្តិវិញ City ធ្លាប់ឈ្នះ 5-1 និង 4-1 លើ Club Brugge ក្នុងវគ្គវិលជុំនៅរដូវកាល 2021-22 ដែលអតីតអ្នកចាត់ការ Barcelona រូបនេះថា ស្ថានភាព Club Brugge ខុសគ្នាឆ្ងាយបើប្រៀបធៀបនឹងប៉ុន្មានឆ្នាំមុន។ ក្លិបប៊ែលហ្ស៊ិកមួយនេះ មិនដែលចាញ់មួយប្រកួតណាឡើយគ្រប់ក្របខណ្ឌទាំងអស់តាំងពីចុងខែតុលាឆ្នាំមុន តែពួកគេកំពុងឈរលេខ 20 នៅ UCL នេះនៅពីលើ City 3 ពិន្ទុ៕