Man City នាំយកខ្សែការពារវ័យក្មេង Vitor Reis ពី Palmeiras ជាផ្លូវការ

Man City បានបំពេញរួចរាល់ក្នុងផ្ទេរខ្សែការពារវ័យក្មេង Vitor Reis ពីក្លិបប្រេស៊ីល Palmeiras ក្នុងតម្លៃផ្ទេរ 29.6 លានផោន។ កីឡាករវ័យ 19 ឆ្នាំរូបនេះបានចុះហត្ថលេខារយៈពេល 4 ឆ្នាំកន្លះ និងបានចូលហ្វឹកហាត់លើកដំបូងផងដែរជាមួយ City នៅថ្ងៃអង្គារម្សិលមិញ។ Vitor Reis លេងនៅតំណែងខ្សែការពារកណ្តាល

បានបង្ហាញខ្លួន 22 ប្រកួតឱ្យ Palmeiras និងជាកីឡាករយុវជនអាយុក្រោម 17 ឆ្នាំប្រេស៊ីលបង្ហាញខ្លួនបាន 9 លើក។ Palmeiras សង្ឃឹមថា នឹងអាចខ្ចី Vitor Reis លេងឱ្យចប់រដូវកាលនេះ តែ Manchester City ត្រូវការកីឡាករវ័យ 19 ឆ្នាំរូបនេះចាំបាច់ក្នុងខែមករានេះ។ Vitor Reis បានក្លាយជាកីឡាករទីពីរដែលផ្លាស់មកកាន់កីឡដ្ឋាន Etihad ក្នុងខែមករានេះ បន្ទាប់ពីខ្សែការពារ អ៊ូសប៊ែគីស្ថាន Abdukodir Khusanov។ ដំណើរការពារជើងឯក Premier League របស់ Manchester City កាន់តែឃ្លាតឆ្ងាយដោយសារបញ្ហារបួសកីឡាករ ជាពិសេសនៅតំបន់ការពារ ដែលធ្វើឱ្យលោក Pep Guardiola ត្រូវការនាំចូលខ្សែការពារបន្ថែមក្នុងខែមករានេះ។ ជាមួយគ្នានោះដែរ City ក៏នឹងទទួលបានខ្សែប្រយុទ្ធមួយរូបទៀតក្នុងខែមករានេះ គឺកីឡាករអេស៊ីប Omar Marmoush ដែលនឹងអាចបញ្ចប់រួចរាល់ក្នុងការផ្ទេរពីក្លិបអាល្លឺម៉ង់ Eintracht Frankfurt៕