អភិនិហា Man Utd វាយបក 3 គ្រាប់ម៉ោងបន្ថែម ទម្លាក់ Lyon ឡើងវគ្គ 1/2 ផ្ដាច់ព្រ័ត្រ UEL

ជារាត្រីមួយដែលមិនអាចបំភ្លេចបានសម្រាប់អ្នកគាំទ្រក្រុមបិសាចក្រហម Manchester United បន្ទាប់ពីជ័យជំនះដ៏តានតឹង ប្រផិតប្រផើយលើក្រុមបារាំង Olympique Lyon នៅម៉ោងបន្ថែម ឡើងវគ្គពាក់កណ្តាលផ្តាច់ព្រ័ត្រ UEFA Europa League។ បន្ទាប់ពីស្មើគ្នា 2-2 ជើងទីមួយនៅទឹកដីបារាំង ឈុតឆាកជាច្រើនបានកើតឡើង

នៅជើងទីពីរលើទឹកដី Old Trafford។ ចាប់ផ្តើមពីវគ្គទីមួយ Manchester United រកបានពីរគ្រាប់នាំមុខមុនដោយ Manuel Ugarte នៅនាទីទី 10 និង Diogo Dalot នៅចុងវគ្គទីមួយនាទីទី 45+1 មានន័យថា United នាំមុខ 4-2 សរុបទាំងពីរជើង។

ក្រុមរបស់លោក Ruben Amorim ក៏ចាប់ផ្តើមធ្លាក់ចុះនៅវគ្គទីពីរបន្ទាប់ពី Lyon រកបានពីរគ្រាប់តាមស្មើវិញដោយ Corentin Tolisso នៅនាទីទី 71 និង Nicolas Tagliafico នាទីទី 77 ធ្វើឱ្យសរុបទាំងពីរជើងឯកក្រុមទាំងពីរស្មើគ្នា 4-4 មុនពេលដែល Lyon សល់គ្នាតែ 10 នាក់នៅពេល Tolisso ទទួលបានកាតលឿងទីពីរ។

សល់គ្នាតែ 10 ត្រូវលេងម៉ោងបន្ថែម 15 នាទីពីរដង ក្រុមរបស់លោក Paulo Fonseca បានធ្វើឱ្យអ្នកគាំទ្រនៅ Old Trafford ស្រឡាំងកាំងដោយរកបានពីរគ្រាប់នៅក្នុងម៉ោងបន្ថែមនាទីទី 104 ដោយ Rayan Chekri និង អតីតខ្សែប្រយុទ្ធ Arsenal, Alexander Lacazette បាល់ពិន័យ 11 ម៉ែត្រនាទីទី 109។

នាំមុខ 6-4 ទៅហើយ Lyon គួរតែជាក្រុមឡើងវគ្គបន្តទៅហើយ ខណៈអ្នកគាំទ្រម្ចាស់ផ្ទះបានត្រឹមឱនមុខចុះ អស់សង្ឃឹម មុនពេលដែល Bruno Fernandes ស៊ុតបាល់ពិន័យ 11 ម៉ែត្រតាមបានមួយគ្រាប់វិញនៅនាទីទី 114 ផ្តល់ក្តីសង្ឃឹមខ្លះមកវិញ ដោយតាមពីក្រោយ 5-6។

ហៀបនឹងចប់ការប្រកួតទៅហើយ ពោលគឺនាទីទី 120 អភិនីហាក៏ចាប់ផ្តើមកើតមានខ្សែបម្រើអង់គ្លេស Kobbie Mainoo ជាអ្នកស៊ុតតាមស្មើសរុបទាំងពីរ 6-6។ ត្រឹមស៊ុតតាមស្មើ ធ្វើឱ្យអ្នកគាំទ្រ Manchester United ស្ទើតែមិនជឿភ្នែកទៅហើយ នៅក្នុងម៉ោងបន្ថែមបង្គ្រប់ Harry Maguire ក៏តែតបញ្ចូលទីគ្រាប់ជ័យជំនះនៅនាទីទី 120+1។

អ្នកចាត់ការ Manchester United លោក Ruben Amorim បានរៀបរាប់ថា ជ័យជំនះក្នុងរាត្រីនេះធ្វើឱ្យក្រុមរបស់លោកភ្លេចអស់រដូវកាលដ៏អាក្រក់របស់ខ្លួន។ នេះជាការប្រកួតដែលគ្រប់គ្នាមិនអាចបំភ្លេចបាន ភាពរីករាយ ភាពសោកសៅ ភាពតប់ប្រមល់ ភាពភ្ញាក់ផ្អើល សុទ្ធតែកើតមានឡើងក្នុងរយៈពេល 120 នាទីនេះ នេះហើយជាបាល់ទាត់។

ដោយឡែកសម្រាប់លទ្ធផលផ្សេងទៀត Athletic Bilbao ឈ្នះ Rangers សរុបទាំងពីរជើង 2-0, Tottenham Hotspur ឈ្នះ Frankfurt សរុបទាំងពីរជើង 2-1 និង Bodo/Glimt ឈ្នះ Lazio ដោយបាល់ 11 ម៉ែត្រកាត់សេចក្តី។

វគ្គពាក់កណ្តាលផ្តាច់ព្រ័ត្រ Athletic Bilbao ជួប Manchester United និង Tottenham Hotspur ជួប Bodo/Glimt ធ្វើឡើងនៅខែក្រោយ ជើងទីមួយថ្ងៃទី1 និងជើងទីពីរថ្ងៃទី 8៕