ដៃគូក្រុមប្រណាំង McLaren ឈ្នះលេខ 1 និងលេខ 2 នៅការប្រណាំង F1 លើទឹកដីចិន

កីឡាករប្រណាំងរថយន្តរបស់ក្រុម McLaren ទាំងពីរនាក់ Oscar Piastri និង Lando Norris បានប្រជែងឈ្នះការប្រណាំងលេខមួយ និងលេខពីរនៅទឹកដីចិន Chinese Grand Prix ដែលជាទីលានទីពីររដូវកាលនេះរបស់ Formula One។ កីឡាករអូស្រ្តាលី Oscar Piastri បានយកឈ្នះការប្រណាំងយកទីចេញដំណើរជាលើកដំបូង

ក្នុងអាជីពកាលពីថ្ងៃសៅរ៍ ខណៈការប្រណាំងនៅថ្ងៃអាទិត្យ Piastri គ្រប់គ្រងស្ថានការបានយ៉ាងល្អដើម្បីយកឈ្នះ ទោះបីបាត់បង់ការនាំមុខមួយរយៈក្តីអំឡុងពេលផ្លាស់ប្តូរកង់។ មិត្តរួមក្រុមកីឡាករអង់គ្លេស Lando Norris មានបញ្ហាប្រាំងនៅជុំចុងក្រោយ តែមកដល់ទីលំដាប់ទីពីរបានដោយនាំមុខឆ្ងាយពីអ្នកលេខបី George Russell។ កីឡាកររបស់ Ferrari, Charles Leclerc មានការប្រណាំងដ៏ល្អរបស់ខ្លួនបើទោះបីជាខូចខាតកាងខាងមុខបន្តិច ក្រោយប៉ះជាមួយមិត្តរួមក្រុម Lewis Hamilton។ Hamilton កាលពីថ្ងៃសៅរ៍មុនការប្រណាំងយកទីចេញដំណើរ បានយកឈ្នះការប្រណាំង Sprint Race ផងដែរ ដែលជាជ័យជំនះដំបូងជាមួយក្រុមថ្មី Ferrari។ យ៉ាងណាក្តីកីឡាករទាំងពីរក្រោយចប់ការប្រកួត ត្រូវបាន F1 លុបចោលចំណាត់ថ្នាក់ដោយសាររថយន្តទាំងពីរគ្រឿងខុសលក្ខណៈបច្ចេកទេស ពោលគឺមានទំងន់ស្រាលជាងការកំណត់នៅក្នុងច្បាប់របស់ F1 ខណៈដែលកីឡាកររបស់ក្រុម Alpine, Pierre Gasly ក៏ដូចច្នោះដែរ។ យោងតាមលទ្ធផលនេះ Lando Norris រក្សាការនាំមុខរបស់ខ្លួនក្នុងតារាងជើងឯកពិភពលោកមាន 44 ពិន្ទុ តាមពីក្រោយដោយ Max Verstappen មាន 36 ពិន្ទុ លេខបី George Russell មាន 35 ពិន្ទុ ខណៈលេខបួន Pscar Piastri មាន 34 ពិន្ទុ។ សម្រាប់ទីលានទីបីរដូវកាលនេះ Formula One នឹងបន្តដំណើរទៅទីលាន Suzuka ប្រទេសជប៉ុនដើមខែមេសាខាងមុខ៕