Mercedes ដេញថ្លៃរថយន្ត F1 ឆ្នាំ 1955 បានជាង 40 លានផោន

រថយន្ត F1 របស់ Mercedes ដែលគេឱ្យឈ្មោះថា The Silver W196 Stromlinienwagen បានក្លាយជារថយន្តដែលមានតម្លៃថ្លៃបំផុតទីពីរក្នុងប្រវត្តិសាស្រ្ត ក្រោយលក់ចេញក្នុងការដេញថ្លៃដល់ទៅ 42.75 លានផោន។ រថយន្ត F1 មួយនេះត្រូវបានបើកបរដោយអតីតវីរបុរស F1 Stirling Moss និង Juan Manuel Fangio។

បុរសសញ្ជាតិអាហ្សង់ទីន Juan Manuel Fangio បានបើកបររថយន្តមួយនេះឈ្នះការប្រណាំង F1 Grand Prix នៅទីក្រុង Buenos Aires កាលពីឆ្នាំ 1955 ខណៈដែលកីឡាករអង់គ្លេស Stirling Moss បើកបររថយន្តមួយនេះដែរ ឈ្នះការប្រណាំងនៅទីលាន Monza ប្រទេសអ៊ីតាលីក្នុងឆ្នាំជាមួយគ្នា។ រថយន្តមួយនេះត្រូវបានដាក់លក់ដេញថ្លៃដោយ RM Sotherby នៅសារមន្ទីរ Mercedes ទីក្រុង Stuttgart ប្រទេសអាល្លឺម៉ង់ ខណៈដែលតម្លៃ 42.75 លានផោននេះបានក្លាយជារថយន្តប្រណាំងដែលមានតម្លៃថ្លៃបំផុត។ កំណត់ត្រាចាស់គឺរថយន្តដែលបើកបរដោយ Fangio របស់ Mercedes ផងដែរលក់បានក្នុងតម្លៃ 19.6 លានផោននៅឆ្នាំ 2013 និងជារថយន្តលក់ចេញថ្លៃបំផុតទីពីរបន្ទាប់ពី Mercedes 300SLR Uhlenhaut Coupe ដែលលក់បានតម្លៃដល់ទៅ 113 លានផោនកាលពីខែឧសភាឆ្នាំ 2022៕