ស្ដីថាអាជ្ញាកណ្ដាលកប់មាត់! Mourinho រងពិន័យបួនប្រកួត និងប្រាក់ជិត 4,500 ដុល្លារ

អ្នកចាត់ការក្លិបទួកគី Fenerbahce លោក Jose Mourinho ត្រូវបានសហព័ន្ធបាល់ទាត់ទួកគីដាក់ពិន័យបួនប្រកួត និងជាទឹកប្រាក់សរុប 35194 ផោនស្មើនឹង 44,355 ដុល្លារ បន្ទាប់ពីលោកបានប្រើប្រាស់ពាក្យសំដីប៉ះពាល់ដល់អាជ្ញាកណ្តាលអំឡុងការប្រកួត Istanbul Derby ទល់នឹង Galatasaray កាលពីថ្ងៃចន្ទ។

ក្លិបបាល់ទាត់ Galatasaray បានចោទប្រកាន់ដោយ បុរសសញ្ជាតិព័រទុយហ្កាល់រូបនេះបានប្រើប្រាស់ភាសារើងអើងផងដែរក្នុងសេចក្តីថ្លែងការមួយក្រោយចប់ការប្រកួត។ ការប្រកួតដែលបញ្ចប់ដោយគ្មានក្រុមស៊ុតបញ្ចូលទី ០-០ នោះ គឺដឹកនាំដោយអាជ្ញាកណ្តាលជនជាតិស្លូវេនី Slavko Vincic បន្ទាប់ពីក្លិបទាំងពីរបានស្នើសុំមកកាន់សហព័ន្ធបាល់ទាត់ទួកគីឱ្យប្រើប្រាស់អាជ្ញាកណ្តាលបរទេស។ តែមន្ត្រីទីបួនគឺជាជនជាតិទួកគី ហើយលោក Mourinho បានធ្វើការរិះគន់ទៅកាន់មន្ត្រីទីបួនជនជាតិទួកគីនោះ អំឡុងសន្និសីតសារព័ត៌មានក្រោយចប់ការប្រកួត។ បុរសវ័យ 62 ឆ្នាំរូបនេះបាននិយាយថា លោកបានដើរទៅបន្ទប់អាជ្ញាកណ្តាលក្រោយការប្រកួតចប់ និងបានប្រាប់ទៅមន្ត្រីទីបួននោះថា ប្រសិនបើលោកជាអាជ្ញាកណ្តាល ការប្រកួតនឹងក្លាយជាមហន្តរាយ។ កាលពីថ្ងៃព្រហស្បតិ៍ម្សិលមិញ សហព័ន្ធបាល់ទាត់ទួកគីបានបញ្ជាក់ពីការដាក់ពិន័យលោក Jose Mourinho ពីររឿងផ្សេងគ្នាដែលរួមមានទីមួយគឺការប្រើប្រាស់ភាសាចោទប្រកាន់អាជ្ញាកណ្តាល ត្រូវពិន័យមិនឱ្យចូលបន្ទប់ផ្លាស់សម្លៀកបំពាក់ និងដឹកនាំការប្រកួតពីរប្រកួត ពិន័យជាទឹកប្រាក់ 117,000 លីរ៉ា(ទួកគី) ស្មើនឹង 2,543 ផោន។ ការពិន័យមួយរឿងទៀតគឺ កង្វះភាពជាអ្នកកីឡា ត្រូវពិន័យពីរប្រកួតនឹងប្រាក់ 32,651 ផោន។ ក្លិបបាល់ទាត់ Fenerbahce បានបញ្ជាក់នៅថ្ងៃសុក្រនេះថា ក្លិបនឹងធ្វើការប្តឹងតវ៉ាជុំវិញការដាក់ពិន័យនេះ៕