គ្រូបាល់ទាត់ជម្រើសជាតិ បង្ហើបគោលដៅធំ 3 របស់ U22 និង U23 ក្នុងឆ្នាំនេះ

លោក Koji Gyotoku គ្រូបង្វឹកក្រុមជម្រើសជាតិកម្ពុជា និងក្រុមជម្រើសជាតិយុវជនអាយុក្រោម 23ឆ្នាំកម្ពុជា បានបង្ហើបពីបេសកកម្មធំៗចំនួន 3 សម្រាប់ក្រុមជម្រើសជាតិ U22 និង U23 កម្ពុជា ដែលលោកនឹងផ្ដោតសំខាន់ក្នុងឆ្នាំនេះ។ ការបង្ហើបនេះ ធ្វើឡើងមុនពេលលោកដឹកនាំក្រុមជម្រើសជាតិកម្ពុជា ឬក្រុមធំគោព្រៃ ទៅប្រទេសវៀតណាម

កាលពីរសៀលថ្ងៃចន្ទកន្លងទៅ ដើម្បីត្រៀមការប្រកួតមិត្តភាពអន្ដរជាតិ ជាមួយក្រុមជម្រើសជាតិវៀតណាម នៅកីឡដ្ឋាន Gò Đậu ខេត្ត Binh Duong នាថ្ងៃទី19 ខែមីនា ឆ្នាំ2025 ខាងមុខ។ លោក Koji បានគូសបញ្ជាក់ថា ការប្រមូលផ្ដុំក្រុមជម្រើសជាតិកម្ពុជាលើកនេះ លោកមិនសូវបានតាមដាន សម្រាប់ការប្រកួតកីឡាករច្រើនប៉ុន្មានទេ ដោយសារលោកគិតថា ឆ្នាំនេះ ក្រុមជម្រើសជាតិ មិនសូវមានការប្រកួតសំខាន់ តែអ្វីដែលលោកផ្ដោតសំខាន់ គឺក្រុមជម្រើសជាតិ U22 និង U23 កម្ពុជា ដែលនឹងមានការប្រកួតសំខាន់ៗចំនួន 3 នាខែកក្កដា, ខែកញ្ញា និងខែវិច្ឆិកាខាងមុខ ។ ដូច្នេះទើបការប្រមូលផ្ដុំរបស់ក្រុមធំគោព្រៃលើកនេះ លោកបានដាក់បញ្ចូលយុវជនមួយចំនួន គ្រាដែលការប្រកួតមិត្តភាពអន្ដរជាតិ ជាមួយក្រុមម្ចាស់ផ្ទះវៀតណាម ស្អែកនេះ លោកក៏នឹងពិនិត្យមើលលក្ខខណ្ឌរបស់កីឡាករវ័យក្មេងទាំងអស់នោះ បន្ទាប់ពីពួកគេបានបង្ហាញសមត្ថភាពក្នុងសមរភូមិដ៏ក្ដៅគគុកនៃលីគកំពូលកម្ពុជា តើពួកគេអាចលេងបានកម្រិតណា ខណៈលោកនឹងព្យាយាមដាក់ពួកគេលេងឲ្យបានច្រើនផងដែរ ។ គួរដឹងថា ក្រុមជម្រើសជាតិកម្ពុជា នឹងត្រូវធ្វើការប្រកួតមិត្តភាពអន្ដរជាតិចំនួន 2ប្រកួត កំឡុងសម្រាក FIFA Day នាខែមីនានេះ ដោយក្រោយជួបក្រុមម្ចាស់ជើងឯកបាល់ទាត់អាស៊ីអាគ្នេយ៍ ឆ្នាំ2024/25 វៀតណាម នាថ្ងៃទី19 ខែមីនា ក្រុមគោព្រៃកម្ពុជា នឹងត្រូវត្រឡប់មកមាតុភូមិវិញ ដើម្បីត្រៀមបើកទ្វារផ្ទះទទួលក្រុមជម្រើសជាតិអារូបា មកពីទ្វីបអាមេរិកខាងត្បូងវិញម្ដង នាថ្ងៃទី25 ខែមីនាខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ។ ចំពោះការប្រកួតមិត្តភាពអន្ដរជាតិនេះ ក៏នឹងមានការផ្សាយផ្ទាល់លើកញ្ចក់ទូរទស្សន៍ BTV-News ផងដែរ ៕