បញ្ចប់ការរង់ចាំ 56 ឆ្នាំ Newcastle ឈ្នះ Liverpool 2-1 លើកពាន Carabao Cup

ទីបំផុតការទន្ទឹងរង់ចាំរយៈពេល 56 ឆ្នាំក្នុងការចង់ឈ្នះពានដំបូងរបស់ក្លិបបាល់ទាត់សារិកាព្រៃ Newcastle បានមកដល់ ក្រោយពីយកឈ្នះហង្សក្រហម Liverpool វគ្គផ្តាច់ព្រ័ត្រនៅ Wembley លើកពាន Carabao Cup។ ខ្សែការពារ Dan Burn អបអរការកោះហៅចូលក្រុមជម្រើសជាតិអង់គ្លេសលើកដំបូងរបស់ខ្លួនជាមួយនឹង

ការតែតបញ្ចូលទីនាំមុខឱ្យ Newcastle នៅនាទីទី 45 មុនពេលដែល Alexander Isak បន្ថែមការនាំមុខ 2-0 នៅវគ្គទីពីរ។ Liverpool ដែលទើបធ្លាក់ពី UEFA Champions League ក្រោយចាញ់ PSG នោះ មិនឱកាសតិចតួចក្នុងការរកគ្រាប់បាល់នៅវគ្គផ្តាច់ព្រ័ត្រ តែយ៉ាងហោចណាស់ក៏តាមពីក្រោយបានមួយគ្រាប់វិញដោយកីឡាករបម្រុង Federico Chiesa នៅចុងម៉ោង។ នៅពេលដែលអាជ្ញាកណ្តាល John Brooks ផ្លុំកញ្ចែបញ្ចប់ការប្រកួត សម្លេងហ៊ោកញ្ជ្រៀវ ភាពសប្បាយរីករាយ និងទឹកភ្នែក បញ្ជាក់ពីក្តីរំភើបរបស់ Newcastle ដែលបានទន្ទឹងរង់ចាំឈ្នះពានដំបូងក្នុងរយៈពេល 56។ Newcastle ឈ្នះពានចុងក្រោយបំផុតគឺពាន Inter-Cities Fairs Cup នៅឆ្នាំ 1969។ បើនិយាយពីការឈានឡើងវគ្គផ្តាច់ព្រ័ត្រ Newcastle មានតែក្តីឈឺចាប់នាពេលកន្លងមក ពោលគឺចាញ់នៅវគ្គផ្តាច់ព្រ័ត្រ 9 លើកមកហើយ តាំងពីឈ្នះពាន FA Cup ចុងក្រោយនៅឆ្នាំ 1955៕