ផ្លូវការ! ពហុកីឡដ្ឋានជាតិមរតកតេជោ ជា Home របស់ព្រះខ័នរាជ ក្នុងពាន Challenge League

ពហុកីឡដ្ឋានជាតិមរតកតេជោ នឹងក្លាយជាទឹកដីរបស់ក្លិបព្រះខ័នរាជស្វាយរៀង សម្រាប់ត្រៀមការប្រកួតពានរង្វាន់កម្រិតទី3 ប្រចាំទ្វីបអាស៊ី AFC Challenge League 2024/2025 ក្រោយទទួលបានការអនុញ្ញាតពីសហព័ន្ធកីឡាបាល់ទាត់អាស៊ី(AFC)។ យោងតាមការជូនដំណឹងរបស់ក្លិបជើងឯកលីគកំពូលកម្ពុជា នៅល្ងាចថ្ងៃទី18

ខែកុម្ភៈ ឆ្នាំ2028 បានឲ្យដឹងថា AFC បានអនុញ្ញាតឲ្យក្លិបព្រះខ័នរាជស្វាយរៀង ប្រើប្រាស់ពហុកីឡដ្ឋានជាតិមរតកតេជោ សម្រាប់ការប្រកួតពានរង្វាន់ AFC Challenge League 2024/2025 ។ ការជូនដំណឹងផ្លូវការនេះ បន្ទាប់ពីតំណាងក្លិប បានជួបពិភាក្សាជាមួយថ្នាក់ដឹកនាំពហុកីឡដ្ឋានជាតិមរតកតេជោ និងបានស្នើទៅកាន់ AFC កាលពីដើមខែកុម្ភៈកន្លងទៅ។ សម្រាប់ការប្រកួតពានរង្វាន់កម្រិតទី3 អាស៊ីនេះដែរ ព្រះខ័នរាជស្វាយរៀង នឹងត្រូវជួបក្រុម Shan United របស់មីយ៉ាន់ម៉ា ដោយជើងទី1 នឹងត្រូវប្រកួតនៅពហុកីឡដ្ឋានជាតិមរតកតេជោ នាថ្ងៃទី06 ខែមីនា មុនធ្វើដំណើរទៅប្រកួតជើងទី2 នៅទឹកដីមីយ៉ាន់ម៉ាវិញ នាថ្ងៃទី13 ខែមីនា ឆ្នាំ2025 ខាងមុខ។ គួរដឹងថា ក្រោយពិធីបើក-បិទព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ2023 មិនធ្លាប់មានកាប្រកួតអន្ដរជាតិផ្លូវការ នៅពហុកីឡដ្ឋានជាតិមរតកតេជោ លើកលែងការប្រកួតលក្ខណៈមិត្តភាពក្នុងស្រុក ។ លើសពីនេះ ព្រះខ័នរាជស្វាយរៀង ក៏ជាក្លិបក្នុងស្រុកដំបូង ដែលប្រើប្រាស់ពហុកីឡដ្ឋានស្ដង់ដារអន្ដរជាតិនេះ សម្រាប់រៀបចំការប្រកួតពានរង្វាន់កម្រិតអន្ដរជាំតិផងដែរ៕