គ្រូព្រះខ័នរាជ និងគ្រូ Shan United និយាយពីការត្រៀមជួបគ្នានៅ មរតកតេជោ

ក្រុមព្រះខ័នរាជស្វាយរៀង នឹងត្រូវជួបក្រុមមីយ៉ាន់ម៉ា Shan United ជាថ្មី នៅក្នុងវគ្គ 8ក្រុមចុងក្រោយ-ជើងទី1 នៃពានរង្វាន់ក្លិបបាល់ទាត់កម្រិតទី3 ទ្វីបអាស៊ី AFC Challenge League 2024/2025 នាវេលាម៉ោង 7យប់ថ្ងៃទី6 ខែមីនា ឆ្នាំ2025 នៅពហុកីឡដ្ឋានជាតិមរតកតេជោ ដោយគ្រូបង្វឹកក្រុមម្ចាស់ផ្ទះ Pep Munoz

បានដាក់ផែនការលេងដោយដាក់សម្ពាធលើគូប្រកួត ស្របពេលគ្រូបង្វឹកក្រុម Shan លោក Ono Hiroki ថា នឹងពិបាកសម្រាប់ក្រុមខ្លួន ទោះបីក្រុមមានទំនុកចិត្តជាងមុនក្ដី ។ ថ្លែងក្នុងសន្និសីទសារព័ត៌មានមុនការប្រកួតលោក Pep បានបញ្ជាក់ថា ការប្រកួតជាមួយ Shan United នាពហុកីឡដ្ឋានធ្វើម្ចា់សផ្ទះស៊ីហ្គេម ឆ្នាំ2023 យប់នេះ ព្រះខ័នរាជស្វាយរៀង ត្រូវការលេងរក្សាបាល់ច្រើន ហើយព្យាយាមដាក់សម្ពាធលើគូប្រកួត រហូតដល់តំបន់គ្រោះថ្នាក់របស់ក្រុមភ្ញៀវ ពោលគឺលោកមិនចង់ឲ្យពួកគេមានឱកាសវាយបកលើក្រុមខ្លួនឡើយ ។ បែបនេះក្ដី លោកក៏បានក្រើនរំឮកកូនក្រុមត្រូវប្រយ័ត្ន ចំពោះការលេងបាល់វែង ភ្ជាប់ពីតំបន់ការពារ មកប្រយុទ្ធផងដែរ ព្រោះ Shan United ក៏មានខ្សែប្រយុទ្ធបរទេសគ្រោះថ្នាក់ ២រូបនៅតំបន់ខាងលើផងដែរ ។ បន្ថែមលើនេះ ទោះបីក្រុមការពារតំណែងជើងឯកលីគកំពូលកម្ពុជា មានភាពមមាញឹកជាមួយការប្រកួតសំខាន់ៗជាច្រើន ទាំងលីគ និងពានអន្ដរជាតិ តែលោកបានបញ្ជាក់ថា គោលដៅរបស់ក្រុម គឺត្រូវការឈ្នះគ្រប់ការប្រកួតនាពេលខាងមុខ ទាំងប្រកួតជាមួយ Shan United ទាំងលីគ ក៏ដូចជាការប្រកួតផ្សេងៗ ហើយដើម្បីសម្រេចនូវគោលដៅនេះ ក្រុមត្រូវការខិតខំហ្វឹកហាត់ និងរៀបចំផែនការមួយឲ្យល្អបំផុត ដើម្បីឈ្នះការប្រកួត ក្រោមយុទ្ធសាស្ដ្រ «គិតពីមួយប្រកួតទៅមួយប្រកួត» ដើម្បីកុំឲ្យប៉ះពាល់អារម្មណ៍កីឡា ។ ចំណែកលោក Ono Hiroki គ្រូបង្វឹកក្រុម Shan United វិញ ជាមួយភាពរីករាយក្នុងការត្រឡប់មកប្រកួតនៅកម្ពុជាម្ដងទៀត លោកក៏បានស្វែងយល់ពីព្រះខ័នរាជស្វាយរៀងច្រើនផងដែរ បន្ទាប់ពីធ្លាប់ចាញ់ 4-2 កាលពីដើមខែកុម្ភៈ ។ លោកថា ការប្រកួតនេះ នឹងលំបាកសម្រាប់ក្រុមខ្លួន ទោះបីបច្ចុប្បន្នក្រុមទាំងមូលមានទំនុកចិត្តខ្ពស់ជាងមុនក៏ដោយ ។ យ៉ាងណាមិញលោកនឹងព្យាយាមលេងឲ្យបានល្អបំផុត ដើម្បីទទួលបានលទ្ធផលល្អប្រសើរ និងធ្វើជាដើមទុនសម្រាប់ការប្រកួតកាត់សេចក្ដីជើងទី2 នៅទឹកដីរបស់ខ្លួន នាថ្ងៃទី12 ខែមីនា ឆ្នាំ2025 ខាងមុខ ។ គួរដឹងថា សម្រាប់ក្រុមឈ្នះ ក្រោយជួបគ្នា 2ជើង រវាងព្រះខ័នរាជស្វាយរៀង និង Shan United នឹងត្រូវឡើងទៅវគ្គពាក់កណ្ដាលផ្ដាច់ព្រ័ត្រ នៃពានរង្វាន់ AFC Challenge League 2024/2025 ដោយត្រូវជួបក្រុមឈ្នះ រវាងក្រុម Tainan City មកពីកោះតៃវ៉ាន និងក្រុម Madura United របស់ឥណ្ឌូនេស៊ី ដែលក្រុមទាំងពីរ ក៏នឹងត្រូវប្រកួត 2ជើង ក្នុងវគ្គ 8ក្រុមចុងក្រោយ នៅថ្ងៃទី6 និងថ្ងៃទី12 ខែមីនា ឆ្នាំ2025 នេះផងដែរ៕