គ្រូព្រះខ័នរាជ នៅតែប្រយ័ត្នប្រយែង ទោះនាំមុខ Shan ដោយគ្រាប់បាល 4 គ្រាប់

លោក Pep Munoz គ្រូបង្វឹកក្រុមព្រះខ័នរាជស្វាយរៀង បានចាត់ទុកក្រុម Shan United នៅតែជាក្រុមខ្លាំង ហើយអាចបង្កគ្រោះថ្នាក់ដល់ក្រុមខ្លួន ដែលទាមទារឲ្យក្រុមត្រូវផ្ដោតការយកចិត្តទុកដាក់ខ្ពស់ ដើម្បីទទួលបានជ័យជម្នះជាថ្មី និងឈានទៅវគ្គពាក់កណ្ដាលផ្ដាច់ព្រ័ត្រ នៃពានរង្វាន់ក្លិបបាល់ទាត់កម្រិតទី3 ប្រចាំទ្វីបអាស៊ី AFC Challenge

League 2024/25។ ថ្លែងក្នុងសន្និសីទសារព័ត៌មានមុនជំនួបជើងទី2 ក្នុងវគ្គ 8ក្រុមចុងក្រោយ រវាងក្រុមទាំងពីរ នៅកីឡដ្ឋាន Thuwunna នាទីក្រុងយ៉ាំងហ្គូន នាល្ងាចថ្ងៃទី13 ខែមីនានេះ លោក Pep បានគូសបញ្ជាក់ថា លោកបានបំភ្លេចលទ្ធផលជើងទី1 ហើយបានរៀបចំ និងក្រើនរំឮកកូនក្រុមឲ្យផ្ដោតការប្រកួតជើងទី2 ដែលជាការប្រកួតថ្មី ជាមួយការគោរពដៃគូប្រកួត ព្រោះ Shan មានគុណភាពក្រុម និងកីឡាករល្អៗជាច្រើន ។ ដូច្នេះលោកចាត់ទុកនេះ គឺជាការប្រកួតដ៏សំខាន់ ដើម្បីប្រជែងកៅអីវគ្គបន្ដ ។ សូមរំឮកថា កាលពីជើងទី1 ក្រុមព្រះខ័នរាជស្វាយរៀង បានយកឈ្នះក្រុមទើបគ្រងជើងឯកលីគកំពូលមីយ៉ាន់ម៉ានេះ 6-2 នៅពហុកីឡដ្ឋានជាតិមរតកតេជោ រាជធានីភ្នំពេញ ។ ដូច្នេះប្រសិនបើព្រះខ័នរាជស្វាយរៀង បន្ដធ្វើបានល្អឈ្នះ ឬស្មើ ឬចាញ់តិចជាង 4គ្រាប់ ក្នុងជំនួបកាត់សេចក្ដីនាល្ងាចថ្ងៃព្រហស្បត្តិនេះ ពួកគេនឹងទទួលបានកៅអីវគ្គពាក់កណ្ដាលផ្ដាច់ព្រ័ត្រ នៃពានរង្វាន់ AFC Challenge League 2024/2025 ដោយត្រូវជួបក្រុមឈ្នះ រវាងក្រុម Tainan City ឆាយនីសតៃប៉ិ និងក្រុម Madura United របស់ឥណ្ឌូនេស៊ី ដែលត្រូវប្រកួតកាត់សេចក្ដីជើងទី2 នៅល្ងាចថ្ងៃទី13 ខែមីនានេះជាមួយគ្នា បន្ទាប់ពីជើងទី1 ក្រុមទាំងពីរ បានស្មើគ្នា 0-0 នៅទឹកដីឆាយនីសតៃប៉ិ ៕