Real Madrid ត្រូវការ Xabi Alonso មកដឹកនាំ មុនប្រកួត Club World Cup

ក្លិបយក្សអេស្ប៉ាញ Real Madrid ត្រូវការអ្នកចាត់ការ Xabi Alonso មកកាន់តំណែងឱ្យបានមុនព្រឹត្តិការណ៍ Club World Cup មកដល់ខែក្រោយ នេះបើតាមការចុះផ្សាយរបស់សារព័ត៌មានកីឡាធំៗនៅអឺរ៉ុប។ ប្រភពព័ត៌មានកៀកនឹងក្លិបអេស្ប៉ាញបានឱ្យដឹងថា បុរសវ័យ 43 ឆ្នាំសញ្ជាតិអេស្ប៉ាញរូបនេះ

នឹងធ្វើដំណើរទៅកាន់ទីក្រុង Madrid នៅថ្ងៃទី 1 ខែមិថុនាខាងមុខដើម្បីរៀបចំក្រុមសម្រាប់ Club World Cup ដែលនឹងចាប់ផ្តើមនៅថ្ងៃទី 18 ខែមិថុនាទល់នឹងក្លិបអារ៉ាប៊ីសាអ៊ូឌីត Al-Hilal។ អតីតខ្សែបម្រើ Real Madrid, Liverpool និងជម្រើសជាតិអេស្ប៉ាញរូបនេះ បានប្រកាសកាលពីថ្ងៃសុក្រថានឹងចាកចេញពី Bayer Leverkusen នៅដំណាច់រដូវកាលនេះ។ មិនមែនជាបំណងរបស់ Alonso ក្នុងការទៅកាន់តំណែងនៅ Real Madrid លឿនពេកនោះទេ តែនេះគឺជាការចង់បានរបស់ Real Madrid ដើម្បីឱ្យ Alonso កាន់តំណែងផ្លូវការសម្រាប់ការប្រកួតសំខាន់ ប្រសើរជាងប្រើប្រាស់អ្នកចាត់ការបណ្តោះអាសន្ន។ អ្នកចាត់ការបច្ចុប្បន្នលោក Carlo Ancelotti ប្រហែលជានឹងត្រូវចាកចេញក្រោយការប្រកួតក្នុងទឹកដីចុងក្រោយទល់នឹង Real Sociedad នៅថ្ងៃទី 25 ខែឧសភានេះ ដើម្បីទៅកាន់តំណែងដឹកនាំក្រុមជម្រើសជាតិប្រេស៊ីល។ លោក Ancelotti បានមកកាន់តំណែងដឹកនាំ Real Madrid លើកទីពីរនៅឆ្នាំ 2021 និងបានដឹកនាំក្រុមឈ្នះជើងឯក Champions League ហើយជាជើងឯកទីបីសម្រាប់ក្លិបក្រោមការដឹកនាំរបស់អ្នកចាត់ការអ៊ីតាលីរូបនេះ៕