តារារះថ្មី Joao Fonseca ទម្លាក់កីឡាករលេខ 9 Andrey Rublev ជុំទីមួយ Australian Open

​កីឡាករវាយកូនបាល់វ័យក្មេងប្រេស៊ីល ដែលគេពុំសូវស្គាល់ឈ្មោះ Joao Fonseca បានធ្វើឱ្យពិភពលោកងាកមកចាប់អារម្មណ៍ក្រោយទម្លាក់កីឡាករលំដាប់លេខ 9 Andrey Rublev ជុំដំបូងវាយកូនបាល់ Grand Slam, Australian Open។

​វ័យទើបតែ 18 ឆ្នាំ Joao Fonseca បានក្លាយជាកីឡាករដំបូងដែលទម្លាក់កីឡាករ

លំដាប់ Top10 នៅ Australian Open ឆ្នាំនេះក្រោយយកឈ្នះបីសិតផ្ទួនៗ 7-6(7-1) 6-3 និង 7-6(7-5)។

​នេះជាការចូលរួមលើកដំបូងប៉ុណ្ណោះនៅក្នុងព្រឹត្តិការណ៍ Grand Slam សម្រាប់ Joao Fonseca បន្ទាប់ពីឆ្លងកាត់វគ្គជម្រុះដល់ទៅបីប្រកួតសប្តាហ៍មុន។

​Joao Fonseca បានក្លាយជាកីឡាករវ័យក្មេងទីពីរប៉ុណ្ណោះដែលយកឈ្នះកីឡាករលំដាប់ Top10 នៅ Grand Slam បែបនេះបន្ទាប់ពី Mario Ancic យកឈ្នះ Roger Federer នៅ Wimbledon កាលពីឆ្នាំ 2002។

​រំលឹកថា Joao Fonseca បានចាប់ផ្តើមរដូវកាលមុនឆ្នាំ 2024 នៅចំនាត់ថ្នាក់លេខ 730 ពិភពលោក តែបញ្ចប់រដូវកាលឡើងមកដល់លេខ 150។

​នេះជាជ័យជំនះ 14 ប្រកួតជាប់គ្នាផងដែរសម្រាប់ Fonseca ខណៈជុំទីពីរគេនឹងត្រូវជួបជាមួយកីឡាករអ៊ីតាលី Lorenzo Sonego៕