ពានសម្ដេចតេជោឈានដល់សប្ដាហ៍ចុងក្រោយ នៃការស្វែងរកបេក្ខភាពវគ្គ ½ ផ្ដាច់ព្រ័ត្រ

ពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី18 (ថ្នាក់ជាតិ) ឆ្នាំ2024/25 នឹងត្រូវធ្វើការប្រកួតកាត់សេចក្ដីជើងទី2 សម្រាប់វគ្គ 8ក្រុមចុងក្រោយ នៅថ្ងៃទី2 និងថ្ងៃទី3 ខែមេសា ឆ្នាំ2025 នេះ ដើម្បីស្វែងរកបេក្ខភាពឡើងវគ្គពាក់កណ្ដាលផ្ដាច់ព្រ័ត្រ(1/2) ដ្បិតរកឃើញ 1ក្រុមកំពុងឈរចាំ គឺក្រុមភ្នំពេញក្រោន។

សម្រាប់ការប្រកួតនៅថ្ងៃពុធស្អែកនេះ គឺមាន 2គូ ក្នុងនោះក្រុមការពារតំណែងជើងឯកព្រះខ័នរាជស្វាយរៀង ត្រូវបើកទ្វារផ្ទះស្វាគមន៍ក្រុមភ្ញៀវគិរីវង់សុខសែនជ័យវិញម្ដង បន្ទាប់ពីយកឈ្នះក្រៅដី 2-0 កាលពីជើងទី1 ។ រីឯ 1គូទៀត គឺក្រុមវិសាខា ត្រូវជួបក្រុមភ្ញៀវសមាគមកីឡាបាល់ទាត់កងយោធពលខេមរភូមិន្ទ បន្ទាប់ពីជើងទី1 ក្រុមទាំងពីរ បានស្មើគ្នា 2-2 នៅកីឡដ្ឋានស្ដាតចាស់។ ដោយឡែកការប្រកួតនៅថ្ងៃទី3 ខែមេសា មាន 1គូប៉ុណ្ណោះ រវាងក្រុមបឹងកេត និងក្រុម ISI ដង្កោសែនជ័យ នៅពហុកីឡដ្ឋានជាតិ(អូឡាំពិក) ។ កាលពីជើងទី1 អតីតក្រុមជើងឯកឆ្នាំ2019 បឹងកេត បានយកឈ្នះក្រុមម្ចាស់ផ្ទះដំរីជ័យ 2-0 ។ តាមរយៈលទ្ធផលបណ្ដោះអាសន្ននេះ គេឃើញព្រះខ័នរាជស្វាយរៀង និងបឹងកេត កំពុងមានប្រៀប ដ្បិតមានផលចំណេញគ្រាប់បាល់ 2គ្រាប់ក្នុងដៃរៀងខ្លួន គ្រាដែលវិសាខា និងកងយោធពលខេមរភូមិន្ទ នៅមានឱកាស 50/50 ស្មើគ្នា ក្នុងការប្រកួតជែងកៅអីវគ្គពាក់កណ្ដាលផ្ដាច់ព្រ័ត្រ នៃពានរង្វាន់សម្ដេចតេជោ ហ៊ុន សែន-ថ្នាក់ជាតិ ឆ្នាំនេះ ។ ក្រោយបញ្ចប់ការប្រកួតកាត់សេចក្ដីនេះ សម្រាប់ក្រុមទទួលបានជ័យជម្នះ ក្រោយសរុបលទ្ធផលទាំង 2ជើង រវាងព្រះខ័នរាជស្វាយរៀង និងក្រុមគិរីវង់សុខសែនជ័យ ក៏ដូចជារវាងក្រុមបឹងកេត និងក្រុម ISI ដង្កោសែនជ័យ នឹងត្រូវឡើងទៅជួបគ្នានៅវគ្គពាក់កណ្ដាលផ្ដាច់ព្រ័ត្រ ។ ចំណែកក្រុមឈ្នះ រវាងវិសាខា និងកងយោធពលខេមរភូមិន្ទ នឹងត្រូវឡើងទៅជួបក្រុមភ្នំពេញក្រោន ដែលកំពុងឈរចាំ បន្ទាប់ពីភ្នំពេញក្រោន បានយកឈ្នះណាហ្គាវើលដ៏ កាលពីថ្មីៗ៕