ស្វាយរៀងជួបណាហ្គា ថាយហ្គឺរប៉ះក្រោន វិសាខាទទួលបឹងកេត ក្នុងលីគចុងសប្ដាហ៍នេះ

បន្ទាប់ពីសម្រាកការប្រកួត 2សប្ដាហ៍ កំឡុងថ្ងៃ FIFA Day លីគកំពូលកម្ពុជា នឹងត្រឡប់មកវិញ នាចុងសប្ដាហ៍នេះ ជាមួយការប្រកួតសន្សំពិន្ទុ ដំណាក់កាលទី2 ដោយមាន 4ប្រកួត ក្នុងនោះមានជំនួបរវាងបេក្ខភាព Top-6 ចំនួន 3ប្រកួត ខណៈជំនួបរវាងក្រុម Bottom 5 ចំនួន 1ប្រកួត ។ សម្រាប់ជំនួបក្រុមខ្លាំង ប៉ះខ្លាំង ក្នុងសប្ដាហ៍ទី26

រួមមាននៅថ្ងៃទី29 ខែមីនា ក្រុមការពារតំណែងជើងឯកព្រះខ័នរាជស្វាយរៀង ត្រូវជួបក្រុមម្ចាស់ផ្ទះណាហ្គាវើលដ៏ នៅកីឡដ្ឋានខេត្តកំពង់ស្ពឺ បន្ទាប់ពីជួបគ្នា 2ជើង កាលពីដំណាក់កាលទី1 ព្រះខ័នរាជស្វាយរៀង បានយកឈុ្នះ 2-0 ដូចគ្នា ។ ប៉ុន្ដែនៅថ្ងៃសៅរ៍ ក្នុងម៉ោងដំណាលគ្នានោះដែរ ក៏នឹងមានជំនួបរវាងក្រុមខាងក្រោមទាំង 5 រវាងក្រុមសមាគមកីឡាបាល់ទាត់ក្រសួងមហាផ្ទៃ និងសមាគមកីឡាបាល់ទាត់កងយោធពលខេមរភូមិន្ទ នៅកីឡដ្ឋានអេអាយអេ ខេអឹមអេចផាក ផងដែរ ។ ដោយឡែកនៅថ្ងៃទី30 ខែមីនា គឺមាន 2ប្រកួត ដោយក្រុមអង្គរថាយហ្គឺរ ត្រូវបើកទ្វារផ្ទះស្វាគមន៍ក្រុមភ្នំពេញក្រោន ។ កាលពីជើងទី2 ក្រុមទាំងពីរ បានប្រកួតស្មើគ្នា 1-1 នៅកីឡដ្ឋានអាគីហ៊ីរ៉ូកាតូ បន្ទាប់ពីជើងទី1 ភ្នំពេញក្រោន បានយកឈ្នះក្នុងដី 3-1 ។ ដូច្នេះចាំមើលជួបគ្នាលើកទី3 តើក្រុមនឹងទទួលបាន 3ពិន្ទុ? រីឯ 1គូទៀត គឺក្រុមវិសាខា ត្រូវបើកទ្វារផ្ទះទទួលក្រុមបឹងកេត នៅកីឡដ្ឋានព្រីនស៍ ។ កាលពីដំណាក់កាលទី1 វិសាខា បានយកឈ្នះក្រុមនាគខៀវទាំង 2ជើង ដោយជើងទី1 បានយកឈ្នះក្នុងដី 1-0 មុនយកឈ្នះក្រៅដី 2-0៕