ប្រធានសហព័ន្ធគុនខ្មែរ បង្ហាញផលចំណេញពីការប្រកួតគុនខ្មែរលើទឹកដីអាមេរិក

សហព័ន្ធកីឡាប្រដាល់គុនខ្មែរ មានត្រៀមប្រតិភូសរុប 20នាក់ ក្នុងនោះមានកីឡាករ-កីឡារិនី 4រូប ត្រូវទៅប្រកួតដណ្ដើមខ្សែក្រវាត់ ក្នុងព្រឹត្តិការណ៍ប្រកួតគុនខ្មែរអន្ដរជាតិកម្ពុជា-អាមេរិក នាល្ងាចថ្ងៃទី12 ខែមេសា ត្រូវនឹងព្រឹកថ្ងៃទី13 ខែមេសា ឆ្នាំ2025 នៅកម្ពុជា។ ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានថ្លែងក្នុងសន្និសីទ

សារព័ត៌មាន នៅថ្ងៃទី1 ខែមេសាថា នេះគឺជាព្រឹត្តិការណ៍ប្រវត្តិសាស្ដ្រថ្មី សម្រាប់គុនខ្មែរ ដែលត្រូវរៀបចំការប្រកួតលើទឹកដីអាមេរិក ដោយមានកិច្ចសហការពីស្ថាប័នប្រដាល់សេរីពិភពលោក (WCK) ដែលជាស្ថាប័នមួយមានអាជ្ញាប័ណ្ណរៀបចំការប្រកួតនៅទឹកដីអាមេរិក ពិសេសនៅរដ្ឋកាលីហ្វ័រញ៉ា។ ឯកឧត្តមបានចាត់ទុកនេះគឺជាឱកាសមាសមួយ សម្រាប់ការផ្សព្វផ្សាយគុនខ្មែរលើទឹកដីមហាអំណាច ដែលជារឿងចាំបាច់បំផុតមួយ ព្រោះសហរដ្ឋអាមេរិក គឺជាទឹកដីប្រមូលផ្ដុំដោយប្រជាពលរដ្ឋចម្រុះជាតិសាសន៍ដ៏ច្រើន ។ ដូច្នេះការរៀបចំព្រឹត្តិការណ៍ប្រកួតលើទឹកដីអាមេរិក នឹងបង្ហាញដល់ពិភពលោកឲ្យបានឃើញថា គុនខ្មែរ បានទៅដល់គ្រប់ទិសទីនៅលើពិភពលោក។ ចំពោះកីឡាករ-កីឡាការិនីកម្ពុជា ដែលបានជ្រើសរើសចេញទៅប្រកួតលើទឹកដីអាមេរិក នាសប្ដាហ៍ក្រោយ រួមមានកីឡាករ ធន់ រិទ្ធី, ពេជ្រ សម្បត្តិ, រឿង សោភ័ណ្ណ និងកីឡាការិនី អេ យ៉ានុត ដែលជួបតតាំងជាមួយកីឡាករ-កីឡាការិនីខ្លាំងៗរបស់អាមេរិក ក្នុងនោះ រឿង សោភ័ណ្ណ និង អេ យ៉ានុត នឹងត្រូវប្រកួតដណ្ដើមខ្សែក្រវាត់គុនខ្មែរកម្ពុជា-អាមេរិក ក្នុងលក្ខខណ្ឌប្រកួតរយៈពេល ៣ទឹក។ ចំណែកកីឡាករ ធន់ រិទ្ធី និង ពេជ្រ សម្បត្តិ នឹងត្រូវប្រកួតដណ្ដើមខ្សែក្រវាត់ WCK Kun Khmer ប្រចាំសហរដ្ឋអាមេរិក ក្នុងលក្ខខណ្ឌប្រកួត 5ទឹក តែប្រើប្រាស់ច្បាប់គុនខ្មែរដូចគ្នា ។ ម្យ៉ាងវិញទៀត ដើម្បីធានាការប្រកួតប្រព្រឹត្តទៅតាមនិយាមក្បាច់គុនបុរាណខ្មែរ សហព័ន្ធក៏បានរៀបចំក្រុមភ្លេងខ្មែរជាពិសេស សម្រាប់ធ្វើការប្រគំថ្វាយបង្គំគ្រូ និងអមជាមួយការប្រកួត រវាងកីឡាករកម្ពុជា និងអាមេរិកផងដែរ។ ឯកឧត្តម ខូវ ឆាយ បានបន្ថែមទៀតថា មុនឈានដល់ការប្រកួតផ្លូវការ ប្រតិភូគុនខ្មែរ និងកីឡាករ-កីឡាការិនីកម្ពុជា ក៏ត្រៀមនឹងចូលរួមកម្មវិធីសង្ក្រាន្ដឆ្នាំថ្មី ជាមួយប្រជាពលរដ្ឋខ្មែរ លើទឹកដីអាមេរិក ពិសេសនៅទីក្រុងឡុងប៊ិច ដែលមានពលរដ្ឋខ្មែរជាង 3ម៉ឺននាក់រស់នៅ ក៏ដូចជារដ្ឋកាលីហ្វ័រញ៉ា ដែលមានពលរដ្ឋខ្មែររស់នៅជាង 30ម៉ឺននាក់ នាថ្ងៃទី5 ខែមេសា និងត្រៀមចូលរួមកម្មវិធីដង្ហែក្បួនវប្បធម៌ ជាមួយពលរដ្ឋខ្មែរខ្ទង់ម៉ឺននាក់ នៅថ្ងៃទី6 ខែមេសា ដើម្បីផ្សព្វផ្សាយពីសិល្បៈក្បាច់គុនបុរាណខ្មែរផងដែរ។ ក្រោយពីការប្រកួតគុនខ្មែរអន្ដរជាតិកម្ពុជា-អាមេរិក នាថ្ងៃទី12 ខែមេសា នៅចុងខែឧសភា ឆ្នាំ2025 ខាងមុខ នឹងមានការប្រកួតគុនខ្មែរដ៏ធំមួយទៀត នៅទីក្រុងតាកូម៉ា រដ្ឋវ៉ាស៊ីនតោន សហរដ្ឋអាមេរិកផងដែរ៕