លទ្ធផលជារឿងផ្សេង ពេលនេះ Man Utd បង្ហើបរឿងសង់កីឡដ្ឋានផ្ទុកបាន 10 ម៉ឺននាក់

ក្លឹបបិសាចក្រហម Manchester United បានបង្ហាញគម្រោងសាងសង់កីឡដ្ឋានថ្មីដែលមានតម្លៃពីរពាន់លានផោន (2.59 ពាន់លានដុល្លារ) ដែលអាចផ្ទុកទស្សនិកជនបាន 100,000 នាក់ក្លាយជាកីឡដ្ឋានដ៏ធំបំផុតនៅចក្រភពអង់គ្លេស មានទីតាំងក្បែរកីឡដ្ឋានចាស់ Old Trafford នេះបើតាមក្លឹបប្រកាសកាលពីថ្ងៃអង្គារ។

Manchester United បានតែងតាំងក្រុមការងារដឹកនាំកាលពីខែកញ្ញា ដើម្បីបង្កើតផែនការមេសិក្សាតំបន់ជុំវិញ Old Trafford ដែលជាផ្នែកមួយនៃគម្រោងបង្កើតឡើងវិញ។ ក្លឹបបានបង្ហាញការរចនាស្ថាបត្យកម្មសម្រាប់កីឡដ្ឋានថ្មី ដែលមានដំបូងដូចជាឆ័ត្រនៅក្នុងពិធីធ្វើបទបង្ហាញនៅទីក្រុងឡុងដ៍ចក្រភពអង់គ្លេស។ កីឡដ្ឋាននេះនឹងក្លាយជាផ្នែកមួយនៃការបង្កើតឡើងវិញយ៉ាងទូលំទូលាយនៃតំបន់ Old Trafford ដោយរដ្ឋមន្ត្រីហិរញ្ញវត្ថុអង់គ្លេស Rachel Reeves ថ្មីៗនេះបានផ្តល់ការគាំទ្រពេញទំហឹងសម្រាប់គម្រោងនេះ។ Manchester United បានឱ្យដឹងថា គម្រោងនេះអាចបង្កើតការងារថ្មីដល់ទៅ 92000 ហើយនឹងនាំទៅដល់ការសាងសង់ផ្ទះចំនួន 17,000 និងមានតម្លៃបន្ថែម 7.3 ពាន់លានផោនក្នុងមួយឆ្នាំដល់សេដ្ឋកិច្ចអង់គ្លេស៕