ក្លិបលីគទីបី Bielefeld ទម្លាក់ Leverkusen ឡើងវគ្គផ្តាច់ព្រ័ត្រ German Cup លើកដំបូង

ក្រុមនៅលីគទីបីអាល្លឺម៉ង់ Arminia Bielefeld បានធ្វើឱ្យមានការភ្ញាក់ផ្អើលយប់ថ្ងៃអង្គារម្សិលមិញនេះ បន្ទាប់ពីទម្លាក់ក្រុមការពារតំណែងជើងឯក Bayer Leverkusen ឡើងវគ្គផ្តាច់ព្រ័ត្រ German Cup លើកដំបូងក្នុងប្រវត្តិសាស្រ្ត។ Bielefeld ដែលបានទម្លាក់ក្រុមនៅលីគកំពូលចំនួនបួននៅតាមជុំនីមួយៗឡើងមកដល់វគ្គ

នេះបានក្លាយជាក្រុមនៅលីគបាល់ទាត់កម្រិតបីរបស់អាល្លឺម៉ង់ ទីបួនប៉ុណ្ណោះដែលឡើងវគ្គផ្តាច់ព្រ័ត្រ German Cup ។ Leverkusen ដែលមិនស្គាល់ចាញ់សោះនៅ German Cup តាំងពីការមកដល់របស់អ្នកចាត់ការ Xabi Alonso បានបើកការនាំមុខមុនដោយ Jonathan Tah នៅនាទីទី 17។ តែការរីករាយនេះបានត្រឹមបីនាទី បន្ទាប់ពី Marius Woerl តាមស្មើឱ្យ Bielefeld មុនពេលគ្រាប់បាល់ជ័យជំនះកើតឡើងនៅចុងវគ្គទីមួយដោយ Maximilian Grosser ខណៈក្រុមម្ចាស់ផ្ទះបានរក្សាការនាំមុខនេះរហូតដល់ចប់ការប្រកួត។ Leverkusen ដែលឈ្នះជើងឯក Bundesliga និង German Cup ដោយមិនស្គាល់ចាញ់សោះពេញមួយរដូវកាលនោះ កំពុងឈរលេខពីរនៅក្នុងលីគរដូវកាលនេះ តាមពីក្រោយក្រុមកំពូលតារាង Bayern Munich 6 ពិន្ទុខណៈនៅសល់ 7 ប្រកួតទៀតចប់រដូវកាល។ Bielefeld នឹងដឹងគូប្រកួតវគ្គផ្តាច់ព្រ័ត្ររបស់ខ្លួនក្រោយការប្រកួតវគ្គពាក់កណ្តាលផ្តាច់ព្រ័ត្រមួយគូទៀតរាត្រីនេះរវាង Stuttgart និង RB Leipzig ៕