មរណភាពម្ដាយថ្មីៗ! Tiger Woods សម្រេចដកខ្លួនពីការប្រកួត Genesis Invitational

កីឡាករវាយកូនគោលអាមេរិក Tiger Woods បានសម្រេចចិត្តប្រកាសដកខ្លួនពីព្រឹត្តិការណ៍វាយកូនគោល Genesis Invitational ចុងសប្តាហ៍នេះ ដោយសារមរណភាពម្តាយ។ ជើងឯកកម្មវិធីធំ 15 លើក បាននិយាយថា មិនទាន់ត្រៀមខ្លួនរួចរាល់សម្រាប់ការប្រកួត បន្ទាប់ពីមរណភាពម្តាយលោកស្រី Kultida កាលពីថ្ងៃទី 4 ខែកុម្ភៈ។

បីថ្ងៃក្រោយពីថ្ងៃប្រកាសមរណភាពនោះ អ្នករៀបចំការប្រកួតបានប្រកាសពីការចូលរួមរបស់ Tiger Woods។ បែបណាក្ដី Tiger Woods បានបង្ហោះនៅលើបណ្តាញសង្គមផ្ទាល់ខ្លួនថា៖ «ខ្ញុំមិនទាន់ត្រៀមខ្លួនរួចរាល់ឡើយ ខ្ញុំដឹងថាការប្រកួតសប្តាហ៍នេះជាអ្វីដែលម្តាយរបស់ខ្លួនចង់ឃើញ តែការបាត់បង់នេះធំធេងណាស់ ខ្ញុំត្រូវការពេលវេលាបន្ថែម»៕ សូមបញ្ជាក់ថា Tiger Woods មិនទាន់បានចូលរួមការប្រកួតជាប់លាប់ឡើយ តាំងពីរងគ្រោះក្នុងគ្រោះថ្នាក់ចរាចរកាលពីខែកុម្ភៈឆ្នាំ 2021 និងបានទទួលការវះកាត់របួសឆ្អឹងកងខ្នងនៅខែកញ្ញាក្នុងឆ្នាំដដែលនោះ។ បុរសវ័យ 49 ឆ្នាំរូបនេះ បានចូលរួមការប្រកួតចាប់ដៃគូជាមួយកូនប្រុស Charlie Woods កាលពីខែធ្នូឆ្នាំមុន និងចូលរួមការប្រកួត Tomorrow’s Golf League (TGL) ដែលបង្កើតឡើងដោយខ្លួនឯង និង Rory McIlroy។ Tiger Woods គឺជាអ្នករៀបចំព្រឹត្តិការណ៍ Genesis Invitational ចាប់ផ្តើមនៅថ្ងៃព្រហស្បត៍នេះ ដែលដំបូងគ្រោងធ្វើនៅទីលានវាយកូនគោល Riviera Country Club តែត្រូវលើកមក Torrey Pines ទីក្រុង San Diego ដោយសារទីតាំងចាស់រងការឆាបឆេះព្រៃនៅទីក្រុង Los Angeles៕